07.03.2026 | 15:35
NYMEX․ Ոսկու գինն աճել է 1.60%-ով և կազմել 5146.10 դոլար
Եկատերինբուրգում ադրբեջանական սփյուռքի ղեկավարը կամավոր հանձնվել է իրավապահներին
Քաղաքականություն
05.08.2025 | 13:10
Եկատերինբուրգում (Ուրալում) ադրբեջանական սփյուռքի ղեկավար Շահին Շիխլինսկին Մոսկվայում հեռակա կարգով կալանավորվել է։ Նման որոշում է կայացվել նրա նկատմամբ հետախուզում հայտարարելուց հետո, հաղորդում են ադրբեջանական լրատվամիջոցները՝ վկայակոչելով ռուսական աղբյուրներին։
«Խափանման միջոց ընտրելու հարցը քննարկվել է հուլիսի 18-ին։ Բասմանի շրջանային դատարանը որոշել է նրան կալանքի տակ վերցնել»,- նշել է Ura.ru-ի աղբյուրը։
Ոչ պաշտոնական տեղեկությունների համաձայն՝ Շիխլինսկիին կարող են մեղադրանք առաջադրել սպանության փորձի և պետական պաշտոնյայի նկատմամբ բռնության համար։ Շիխլինսկին հերքում է մեղադրանքը։ Նա այժմ Եկատերինբուրգի քննչական մեկուսարանում է։
Օգոստոսի 2-ին ռուսական լրատվամիջոցները հայտնել էին, որ Շահին Շիխլինսկին ձերբակալվել է Մոսկվայում և տեղափոխվել Եկատերինբուրգ: Նշվում էր, որ Շիխլինսկին մասնակցում է նախկինում հարուցված քրեական գործերից մեկի քննչական գործողություններին։ Նրա կարգավիճակն անհայտ է:
ВЧК-ОГПУ տելեգրամ ալիքը հայտնել էր, Շիխլինսկին «կամավոր ներկայացել է Մոսկվայի իրավապահ մարմիններին: Ռուսաստանի մայրաքաղաքից նա տեղափոխվել է Եկատերինբուրգ՝ քննչական գործողություններին մասնակցելու համար»: Ըստ որոշ տեղեկությունների՝ նա թաքնվել է Մոսկվայում Ադրբեջանի դեսպանատանը։ Բանակցություններից հետո նա դուրս է եկել և հանձնվել իշխանություններին։
Պաշտոնապես Ռուսաստանի իրավապահ մարմինները չեն մեկնաբանել Շիխլինսկիի ձերբակալության մասին տեղեկատվությունը:
Հուլիսի վերջին Շեխլինսկիի նկատմամբ հետախուզում էր հայտարարվել։ Ռուսաստանի ՆԳՆ տվյալների բազայի համաձայն՝ նա հետախուզվում էր Քրեական օրենսգրքի հոդվածով։ Սակայն չէր նշվել, կոնկրետ ինչ հոդվածի մասին է խոսքը։
Ավելի վաղ էլ Եկատերինբուրգի Լենինսկի շրջանային դատարանը երկու ամսով կալանավորել էր Շահին Շիխլինսկիի որդուն՝ Մուտվալի Շիխլինսկիին՝«իշխանության ներկայացուցչի նկատմամբ բռնության» գործով։
Թարգմանությունը՝ Էմմա Չոբանյանի
