ՌԴ-ում հետախուզում են հայտարարել Եկատերինբուրգում ադրբեջանական սփյուռքի ղեկավարի նկատմամբ

ՌԴ Ներքին գործերի նախարարությունը քրեական հոդվածով հետախուզում է հայտարարել Եկատերինբուրգի (Ուրալի) ադրբեջանական սփյուռքի ղեկավար Շահին Շիխլինսկիի նկատմամբ, հայտնում են ռուսական լրատվամիջոցները։

Չի նշվում, թե ինչ հոդվածով է Շիխլինսկիի նկատմամբ հետախուզում հայտարարվել։

Ավելի վաղ ռուսական աղբյուրները հայտնել էին, որ Շահին Շիխլինսկիի նկատմամբ հետախուզում է հայտարարվել, սակայն պաշտոնապես դա չէր հաստատվել։ Նշվել էր, որ նա հետախուզվում է պետական պաշտոնյայի նկատմամբ բռնություն գործադրելու գործով, որում մեղադրվում է նրա որդին՝ Մուտվալի Շիխլինսկին։

Հիշեցնենք, որ Եկատերինբուրգի Լենինսկի շրջանային դատարանը երկու ամսով կալանավորել է Մուտվալի Շիխլինսկիին։ Հուլիսի 1-ին հոր՝ Շահին Շիխլինսկիի ձերբակալության ժամանակ նա մեքենայով վրաերթի էր ենթարկել հատուկ նշանակության ուժերի աշխատակիցներից մեկին։ Նա ձերբակալվել, ապա ազատ էր արձակվել։

Ադրբեջանական լրատվամիջոցները նաև հայտնում են, որ դատարանն ուժի մեջ է թողել Մուտվալի Շիխլինսկիի խափանման միջոցը, որը երկու ամսով կալանավորվել է իշխանության ներկայացուցչի նկատմամբ բռնության գործով, հայտնել է տարածաշրջանային դատարանների միասնական մամուլի ծառայությունը։

«Շիխլինսկին և նրա փաստաբանը բողոքարկել են առաջին ատյանի դատարանի որոշումը։ Գործի նյութերն ուսումնասիրելուց և կողմերի կարծիքը լսելուց հետո Սվերդլովսկի մարզային դատարանը Եկատերինբուրգի Լենինյան շրջանային դատարանի որոշումը թողել է անփոփոխ։ Շիխլինսկին կալանքի տակ կմնա մինչև 2025 թվականի սեպտեմբերի 14-ը»,- ասվում է հայտարարության մեջ։

Թարգմանությունը՝ Էմմա Չոբանյանի