Եկատերինբուրգում ձերբակալվել, ապա ազատ է արձակվել ադրբեջանական սփյուռքի ղեկավարը

Ուրալում ադրբեջանական սփյուռքի ղեկավար Շահին Շիխլինսկին նախօրեին Եկատերինբուրգում ձերբակալվել, ապա ազատ է արձակվել: Տեղեկությունը հաստատել է Ադրբեջանի սփյուռքի հետ աշխատանքի պետական ​​կոմիտեն: Ձերբակալության պատճառները չեն հաղորդվում, գրում է Lenta.ru-ն։

Հաղորդվել էր, որ hատուկ նշանակության ուժերը «Բաքու Պլազա» առևտրի կենտրոնի մոտ կանգնեցրել են Mercedes-Benz G-դասի մեքենան, որով Շահինն ու նրա որդին էին երթևեկում։

Տեսանյութում երևում է, թե ինչպես են ուժայինները վազում դեպի  մեքենան և պահանջում, որ ներսում գտնվող մարդիկ դուրս գան մեքենայից։ Այնուհետև նրանք սկսում են մուրճով հարվածել պատուհաններին, վարորդն այդ պահին փորձում է փախչել՝ մեքենան հետընթաց դիրքով տեղափոխելով։ Արդյունքում մեքենան բախվում է հետևում կայանված ավտոմեքենային, նաև գետնին գցում հատուկ նշանակության ուժերի աշխատակիցներից մեկին։ Դրանից հետո նրա գործընկերները հարձակվում են Mercedes-ի վրա և Շիխլինսկուն դուրս հանում մեքենայից։ Նրան պառկեցնում են ասֆալտին։ Տղամարդը փորձել է դիմադրել, սակայն նրան ձեռնաշղթաներ են հագցրել։

«Ես կարծում եմ, որ դա լիազորությունների չարաշահում է, մեր դեմ ուղղված անօրինական գործողություններ: Ես չգիտեմ, թե ինչ վնասվածքներ է ստացել հայրս, ես միայն ոտքի թեթև վնասվածք ունեմ»,- E1.RU-ին տված հարցազրույցում ասել է Մութվալի Շիխլինսկին:

Ավելի վաղ էլ Վորոնեժում ձերբակալվել էր ադրբեջանցի գործարար Յուսիֆ Խալիլովը։ Ադրբեջանական աղբյուրների փոխանցմամբ՝ նա նույնպես ազատ է արձակվել։

Թարգմանությունը՝ Էմմա Չոբանյանի