29.04.2026 | 12:53
Ով է Մուստաֆաևը և ինչով է հայտնի․ Ադրբեջանի փոխվարչապետը Երևանում է․ ՏԵՍԱՆՅՈՒԹ
ԵՄ-ն և Մեծ Բրիտանիան կանչել են ՌԴ դեսպաններին Կիևին հասցված զանգվածային հարվածներից հետո
Քաղաքականություն
28.08.2025 | 17:54
Մեծ Բրիտանիայի արտաքին գործերի նախարարությունը կանչել է Ռուսաստանի դեսպանին Կիևին հասցված զանգվածային hարվածի կապակցությամբ, գրում է BBC-ի ռուսական ծառայությունը։
Սպասվում է, որ դեսպան Անդրեյ Կելինը կհանդիպի Մեծ Բրիտանիայի ԱԳՆ պաշտոնյաների հետ, այլ ոչ թե փոխնախարարների կամ ավելի բարձրաստիճան աշխատակիցների։
ԵՄ արտաքին քաղաքականության պատասխանատու Կայա Կալլասը նույնպես հայտարարել է, որ ԵՄ իշխանությունները կանչել են Բրյուսելում Ռուսաստանի դեսպանին՝ կապված Կիևի վրա հարվածների հետ, որոնք, ի թիվս այլ բաների, վնասել են Ուկրաինայի մայրաքաղաքում դաշինքի առաքելության շենքը։
«Դիվանագիտական առաքելությունները երբեք չպետք է դառնան հարվածների թիրախ։ Մենք կանչում ենք Բրյուսելում Ռուսաստանի դեսպանին»,- գրել է նա X-ի միկրոբլոգում։
Եվրահանձնաժողովի նախագահ Ուրսուլա ֆոն դեր Լեյենը հայտնել է, որ գիշերը 20 վայրկյանի ընթացքում երկու հրթիռ է պայթել Կիևում ԵՄ առաքելությունից 50 մետր հեռավորության վրա։
Կիևի վրա գիշերային հարվածի հետևանքով զոհվել է առնվազն 15 մարդ, վնասվել են Բրիտանական խորհրդի գրասենյակը, «Ազատ Եվրոպա/Ազատություն» ռադիոկայանի Կիևի գրասենյակի շենքը։ Որոշ սենյակներում պատուհանները կոտրվել են, որոշ սարքավորումներ՝ վնասվել։ Ոչ ոք չի տուժել։
Կիևի վրա հարձակումից հետո Մեծ Բրիտանիայի վարչապետ Քիր Սթարմերը X սոցցանցում գրել է. «Իմ ցավակցությունն եմ հայտնում Կիևի վրա Ռուսաստանի կողմից իրականացված անիմաստ հարվածներից տուժածներին, որոնք վնասել են Բրիտանական խորհրդի շենքը: Պուտինը սպանում է երեխաների և խաղաղ բնակիչների, խաթարում խաղաղության հույսերը: Այս արյունահեղությունը պետք է դադարեցվի»:
Թարգմանությունը՝ Էմմա Չոբանյանի
