ՌԴ-ն հրթիռային հարված է հասցրել Կիևում «Բայրաքթար»-ի գործարանին

Ուկրաինայի մայրաքաղաք Կիևում գտնվող ԱԹՍ-ներ արտադրող թուրքական «Բայրաքթար» գործարանը, որը պատրաստվում էր առաջիկայում սկսել գործունեությունը, կեսգիշերին հրթիռային հարվածի է ենթարկվել։ Այս մասին հայտնում է Türkiye Gazetesi-ն։

Նշվում է, որ գրանցվել է երկու հարված, որոնք լուրջ վնաս են հասցրել միլիոնավոր դոլարների ներդրումներին, արտադրական օբյեկտներին։ Պատերազմի ստվերի տակ կառուցված և շուտով շահագործման հանձնվելիք գործարանը, ըստ տեղեկությունների, գրեթե պատրաստ է։ Ըստ տեղեկությունների՝ հիմնական անձնակազմն ավարտել է ուսուցումը, իսկ արտադրական գծերը մոտենում են շահագործման փուլին։

«Baykar»-ը 2019 թվականին հիմնադրել է «Avia Ventures» ՍՊԸ-ն՝ Ուկրաինայում իր արտադրական գործունեությունը կառավարելու համար: Այս ընկերության միջոցով ընթանում էր գործարանի շինարարությունը, որտեղ արտադրվելու են  Bayraktar TB2 և AKINCI անօդաչու թռչող սարքերը:

Նախագիծը խթանել է Թուրքիայի և Ուկրաինայի կառավարությունների միջև 2022 թվականի փետրվարին ստորագրված ավիատիեզերական արդյունաբերության համագործակցության համաձայնագիրը:

Թուրքական լրատվամիջոցը նաև գրում է, որ վերջին շաբաթներին ուկրաինական զինվորականները ծանր հարված են հասցրել  Ռուսաստանին թուրքական արտադրության Bayraktar TB2-ով։ Օգոստոսի 20-ին Խերսոնի մոտ տեղի ունեցած գործողության ժամանակ TB2-ից արձակված MAM-C/L լազերային ուղղորդվող զինամթերքը ճշգրիտ հարված է հասցրել ռուսական պարեկային նավակին։

Baykar-ը նպատակ ունի տեղայնացնել անօդաչու թռչող սարքերի արտադրությունը և նպաստել տեխնոլոգիաների փոխանցմանը՝ իր դուստր ձեռնարկության միջոցով Ուկրաինայում ստեղծելով կենտրոն։ Այս օբյեկտների կառուցման համար նախատեսված ընդհանուր ներդրումը կազմում է 95,5 միլիոն դոլար։

Հավելենք, որ Baykar ընկերության տեխնիկական գծով տնօրեն Սելջուկ Բայրաքթարը Թուրքիայի նախագահ Ռեջեփ Թայիփ Էրդողանի փեսան է։

Թարգմանությունը՝ Էմմա Չոբանյանի