18.12.2025 | 20:03
Միրզոյանը և Մանտաս Ադոմենասը քննարկել են ժողովրդավարական ինստիտուտների զարգացման հարցեր
Բերքը շատ է՝ մեզ համար պրոբլեմ է, բերքը քիչ է՝ էլի պրոբլեմ է. Փաշինյան․ ՏԵՍԱՆՅՈՒԹ
Տնտեսություն
28.08.2025 | 11:41
Կառավարության այսօրվա նիստում քննարկվել է «2025
թվականի լոլիկի մթերումների գործընթացի կազմակերպման միջոցառումը
հաստատելու մասին» նախագիծը։ Էկոնոմիկայի նախարար Գևորգ Պապոյանը տեղեկացրեց, որ նախորդ տարի մթերվել է 15 հազար տոննա լոլիկ, այս պահի դրությամբ՝ ավելի քան 8,800 տոննա լոլիկ, որը շուրջ 5 հազար տոննայով գերազանցում է նախորդ տարվա ցուցանիշը: Նախարարը պարզաբանեց, որ լոլիկի մթերումները կազմակերպելու համար անհրաժեշտ է սուբսիդավորում տրամադրել վերամշակող ընկերություններին։
«Վերջին տարիներին արձանագրվել է տոմատի մածուկի միջազգային գների անկում, և տեղական արտադրության տոմատի մածուկը գնային առումով մրցունակության խնդիրներ ունի ոչ միայն միջազգային շուկայում, այլ նաև տեղական շուկայում: Տոմատի մածուկի շուկայում ստեղծված իրավիճակում տեղական հումքով մածուկ արտադրող տնտեսվարողները շահագրգռված չեն լոլիկի մթերումների իրականացմամբ, և ընթացիկ տարում առկա է շուրջ 7 հազար տոննա լոլիկի մթերման խնդիր։ 2 հազար տոննան գերազանցող մթերված լոլիկի յուրաքանչյուր 1 կգ-ի դիմաց տրամադրվում է 10 դրամի չափով աջակցություն։ Նախապայման է սահմանվում, որ մթերվող լոլիկի նվազագույն գինը չի կարող լինել 40 դրամից ցածր և լոլիկի ամբողջ ծավալը պետք է մթերվի»,- մանրամասնեց նախարարը։
Վարչապետ Նիկոլ Փաշինյանն էլ արձագանքեց, որ այս ծրագիրն իրականացնելու անհրաժեշտությունն առաջացել է լոլիկի առատ բերքի պատճառով։ Ըստ նրա՝ ծրագրի իմաստն այն է, որ ոչ մի լոլիկ արտադրող չպետք է գործարանների դռների մոտ մնա։
«Առիթ ունեցել եմ ասելու, որ երբ բերքը քիչ է լինում, մեզ համար պրոբլեմ է, երբ շատ է լինում, մեզ համար պրոբլեմ է: Անսպասելի տեղեկատվություն էր, որ արդյունաբերական լոլիկի այսքան մեծ ծավալի արտադրություն ունենք։ Կարծում եմ՝ իմաստ կա աշխատելու, թե կարո՞ղ ենք, արդյոք, որևէ աջակցության ծրագիր անել, որպեսզի մի իքս պահի
ստիպված չլինենք լոլիկի մթերումը սուբսիդավորել։ Եթե այս տարի ռեկորդային բերք ենք ստացել, պետք հասկանանք՝ ի՞նչն է պատճառը, գուցե նոր ընկալումներ են ձևավորվել և լոլիկով պետք է ավելի լուրջ զբաղվել»,- նկատեց Փաշինյանը:
Նա նաև հայտարարեց, որ տևական վայրիվերումներից հետո գյուղատնտեսության ոլորտը թևակոխում է կայուն զարգացման փուլ։
Մանրամասները՝ տեսանյութում։
Մանյա Պողոսյան
