19.12.2025 | 23:07
Պետությունը շարունակելու է աշխատանքներ իրականացնել սոցբնակարանային ֆոնդի ընդլայնման ուղղությամբ. ԱՍՀ նախարար
Էրդողանը ներկայացրել է 460 մլն դոլար արժողությամբ «Պողպատե գմբեթ» ՀՕՊ համակարգի առաջին խմբաքանակը
Քաղաքականություն
28.08.2025 | 13:07
Թուրքիայի նախագահ Ռեջեփ Թայիփ Էրդողանը պաշտոնապես ներկայացրել է երկրի ինտեգրված հակաօդային պաշտպանության համակարգը, որը հայտնի է որպես «Պողպատե գմբեթ»։ Էրդողանն այն որակել է որպես երկրի և նրա պաշտպանական արդյունաբերության համար վճռորոշ պահ, փոխանցում է AP-ն։
«Այս համակարգերը Թուրքիայի ուժի ցուցադրություն են։ Հակաօդային պաշտպանության ոլորտում մենք նոր դարաշրջան ենք սկսում մեր սիրելի Թուրքիայի համար»,- ասել է Էրդողանն Անկարայի Aselsan պաշտպանական ընկերության օբյեկտներում կայացած միջոցառման ժամանակ։
Թուրքիայի կառավարությունը «Պողպատե գմբեթ» նախագծի մշակման մեկնարկի մասին հայտարարել էր անցյալ տարվա օգոստոսին։ Էրդողանը նշել է, որ նախագծի վերջին փուլը բաղկացած է 47 միջոցներից (մեքենաներից)՝ 460 միլիոն դոլար արժողությամբ, որոնք «վստահություն կներշնչեն ընկերներին և վախ՝ մեր թշնամիներին»։ Կառավարությունը չի ասել, թե երբ է համակարգը լիովին գործարկվելու։
«Ոչ մի երկիր, որը չի կարող զարգացնել իր սեփական ռադարը և օդային պաշտպանության համակարգը, չի կարող վստահությամբ նայել իր ապագային՝ հաշվի առնելով ներկայիս անվտանգության մարտահրավերները, հատկապես, մեր տարածաշրջանում»,- ասել է Էրդողանը։
Նախկինում Թուրքիան ձգտում էր ամրապնդել իր օդային պաշտպանությունը՝ 2019 թվականին Ռուսաստանից ձեռք բերելով C-400 համակարգեր։ Սակայն այդ քայլը հանգեցրեց ԱՄՆ-ի գլխավորած F-35 ինքնաթիռների ծրագրից Անկարայի դուրս մղվելուն։
Էրդողանը նաև ներկայացրել է Aselsan գործարանի նոր արտադրական հզորությունները, որոնց բացումը նախատեսված է 2026 թվականին:
«Հաջորդ 50 տարիների ընթացքում Թուրքիան կդառնա մի երկիր, որը ոչ միայն կբավարարի իր սեփական կարիքները, այլև կդառնա համաշխարհային առաջատար տեխնոլոգիաների ոլորտում»,- ասել է նա։
Լրատվամիջոցը նշում է, որ 1974 թվականին Կիպրոս ներխուժմանն ի պատասխան ԱՄՆ-ի կողմից զենքի էմբարգո սահմանելուց ի վեր Թուրքիան մեծ ներդրումներ է կատարել իր պաշտպանական արդյունաբերության մեջ՝ զենքի առումով ինքնաբավ դառնալու նպատակով։
Թարգմանությունը՝ Էմմա Չոբանյանի
