Ուկրաինան հարձակվել է ՌԴ-ում երկու նավթավերամշակման գործարանի վրա․ ՏԵՍԱՆՅՈՒԹ

ՌԴ Կրասնոդարի երկրամասում և Սամարայի մարզում ուկրաինական անօդաչու թռչող սարքերի հարձակումների հետևանքով հրդեհներ են բռնկվել երկու նավթավերամշակման գործարաններում, հաղորդում է Meduza-ն։

Կրասնոդարի երկրամասի «Աֆիպսկի» նավթավերամշակման գործարանի տարածքում հրդեհ է բռնկվել, հայտնել է տարածաշրջանի օպերատիվ շտաբը։ Ռուսական կողմի հաղորդմամբ՝ նավթավերամշակման գործարաններից մեկը հրդեհվել է անօդաչու թռչող սարքի բեկորների ընկնելու պատճառով։ Հրդեհի մակերեսը կազմել է 20 քառակուսի մետր։

Սամարայի «Կույբիշևսկի» նավթավերամշակման գործարանում նույնպես հրդեհ է բռնկվել, հաղորդում են տելեգրամ ալիքները: Հրապարակված կադրերում երևում է, որ խիտ ծուխ է բարձրանում նավթավերամշակման գործարանի վերևում: Տեղական իշխանությունները չեն մեկնաբանել գործարանին հարվածի մասին տեղեկությունը:

Ուկրաինական անօդաչու թռչող սարքերն օգոստոսի լույս 28-ի գիշերը հարձակվել են նաև Ռուսաստանի այլ շրջանների վրա: Վոլգոգրադի մարզում հարձակման հետևանքով Պետրով Վալ քաղաքի շոգեքարշային դեպոյում հրդեհ է բռնկվել, գնացքների երթևեկությունը դադարեցվել է։

Ռոստովի մարզի Մանկովո-Կալիտվենսկոյե գյուղում անօդաչու թռչող սարքի բեկորներն ընկել են մասնավոր տան տանիքին՝ վնասելով էլեկտրական լարերը: Պայթյունի վտանգի պատճառով տարհանվել է 89 մարդ, այդ թվում՝ հարևան տների բնակիչներ։

ՌԴ ՊՆ-ն հայտնել է, որ գիշերը Ռուսաստանի տարածքում ՀՕՊ ուժերը խոցել են 102 անօդաչու թռչող սարք, այդ թվում՝ 21-ը՝ Ռոստովի և Սամարայի մարզերում, 18-ը՝ Կրասնոդարի երկրամասում և 2-ը՝ Վոլգոգրադում։

Վերջին շաբաթներին Ուկրաինան ակտիվացրել է Ռուսաստանի նավթավերամշակման գործարանների վրա հարձակումները: Reuters-ի հաշվարկով՝ 10 նավթավերամշակման գործարանների վրա հարձակումները խափանել են Ռուսաստանի նավթավերամշակման հզորությունների առնվազն 17%-ը, որն օրական մշակում է 1,1 միլիոն բարել նավթ:

Թարգմանությունը՝ Էմմա Չոբանյանի