Հայաստանի 10 կուսակցությունների նախագահներ տուգանվել են

Հայաստանի 10 կուսակցությունների նախագահներ վարչական տույժի են ենթարկվել՝ Կոռուպցիայի կանխարգելման հանձնաժողով կուսակցությունների տարեկան ֆինանսական հաշվետվությունները կամ ղեկավար պաշտոնին նշանակումների մասին տեղեկություններ չներկայացնելու համար։ 

ԿԿՀ-ի կայքի ուսումնասիրությամբ Factor.am-ը պարզել է, որ ֆինանսական հաշվետվությունները սահմանված կարգով չներկայացնելու պատճառով 40 հազարական դրամի չափով տույժեր են սահմանվել  «Հայրենատէր» կուսակցության նախագահ Սամվել Շահինյանի, «Ազգային համաձայնություն» կուսակցության նախագահ Արամ Հարությունյանի նկատմամբ։ 

Կուսակցության ղեկավար կազմի պաշտոնատար անձին պաշտոնի նշանակելու կամ ազատելու տվյալները սահմանված կարգով ԿԿՀ չներկայացնելու համար 100 հազարական դրամներով տուգանվել են «Համախմբում» կուսակցության նախագահ Վարդան Օսկանյանը, «Միասնական հայրենիք» կուսակցության նախագահ Մհեր Տերտերյանը, «Միավորում հանուն Հայաստանի» կուսակցության նախագահ Ժասմեն Բաբայանը, «Հայկական վերածնունդ» կուսակցության նախագահ Սիմոն Հակոբյանը, «Ինքնիշխան Հայաստան» կուսակցության նախագահ Դավիթ Սանասարյանը, «Հայաստանի աշխատավորական սոցիալիստական» կուսակցության նախագահ Մովսես Շահվերդյանը, «Քրիստոնեա-ժողովրդական վերածնունդ» կուսակցության նախագահ Մկրտիչ Գիմիշյանը։

Բացի այդ, «Ազգի ձայն» կուսակցության նախագահ Մհեր Մեսրոպյանը (ՀՀ վաստակավոր արտիստ Մհեր Արմենիա) տուգանվել է միանգամից 2 դեպքով՝ ֆինանսական հաշվետվություն և տեղեկություններ չներկայացնելու համար 40 հազար և 100 հազար դրամով։

Գայանե Խաչատրյան