Թրամփը պատրաստակամություն է հայտնել այս տարի հանդիպել Հյուսիսային Կորեայի առաջնորդի հետ

ԱՄՆ նախագահ Դոնալդ Թրամփը դեմ չէ Հյուսիսային Կորեայի առաջնորդ Կիմ Չեն Ընի հետ անձնական հանդիպմանը։ Այս մասին Թրամփը հայտարարել է նախօրեին Վաշինգտոնում Հարավային Կորեայի նախագահ Լի Չժե Մյոնի հետ հանդիպման ժամանակ, փոխանցում է DW-ի ռուսական ծառայությունը։

Նշվում է, որ Լին է  առաջարկել կազմակերպել Թրամփի և Կիմի հանդիպումը: Հարավային Կորեայի առաջնորդի խոսքով՝ դա կարող է տեղի ունենալ հոկտեմբերին՝ Ասիա-խաղաղօվկիանոսյան տնտեսական համագործակցության (APEC) ֆորումի ժամանակ, որին նախատեսվում է նաև Դոնալդ Թրամփի մասնակցությունը։

«Ես հաճույքով կհանդիպեի նրա հետ այս տարի»,- առաջարկին այսպես է արձագանքել Սպիտակ տան ղեկավարը, գրում է Reuters-ը։

Պաշտոնավարման առաջին ժամկետի ընթացքում Դոնալդ Թրամփը երեք անգամ հանդիպել է Կիմ Չեն Ընի հետ։ Թրամփն ասել է, որ լավ է ճանաչում Հյուսիսային Կորեայի առաջնորդին։

«Գրեթե բոլորից լավ՝ բացառությամբ իր քրոջ։ Ես ուրախ կլինեմ տեսնել նրան։ Նա շատ բարեկամական է եղել ինձ հետ»,- ասել է ամերիկացի առաջնորդը։

Reuters-ի փոխանցմամբ՝ Հարավային Կորեայի ղեկավարի պաշտոնը ստանձնելուց հետո Սպիտակ տուն կատարած առաջին այցի ժամանակ Լի Ջե Մյոնն «ակնհայտորեն փորձել է լավ մթնոլորտ ստեղծել»։

Այսպես, նա Թրամփին ասել է, որ Վաշինգտոն մեկնելուց առաջ հատկապես կարդացել է նրա «Գործարքի արվեստը» գիրքը և հույս ունի, որ Թրամփը «կարող է խաղաղություն բերել Կորեական թերակղզի», որպեսզի Ամերիկայի նախագահը և Կիմ Չեն Ընը կարողանան հանդիպում անցկացնել և «Հյուսիսային Կորեայում կառուցել Թրամփի համաշխարհային համալիրը, որտեղ Լի Ջե Մյոնը կարող է գոլֆ խաղալ»։

Իր հերթին, Թրամփը նշել է, որ կցանկանար ազատվել Հարավային Կորեայում գտնվող ԱՄՆ ռազմաբազայի տարածքի վարձակալությունից գնել այդ հողը։ Բազայում տեղակայված է 28,500 ամերիկացի զինվորական։

Ավելի վաղ ԱՄՆ նախագահն իր Truth Social սոցիալական ցանցում գրել էր, որ Հարավային Կորեայում տեղի ունեցողն իրեն հիշեցնում է «քաղաքական զտում կամ հեղափոխություն», և որ ԱՄՆ-ը նման պայմաններում այնտեղ ոչինչ չի կարող անել։

Նշվում է, որ Սպիտակ տանը Թրամփի և Լիի միջև հանդիպումից հետո Վաշինգտոնում տեղի ունեցած միջոցառումներից մեկի ժամանակ Հարավային Կորեայի նախագահը մատնանշել է Հյուսիսային Կորեայի միջուկային ծրագրի առաջխաղացման վտանգը։ Միևնույն ժամանակ, նա հիշեցրել է, որ Փհենյանն անընդհատ մշակում է հրթիռներ և միջուկային զենք՝ չնայած միջազգային պատժամիջոցներին։

Հարավային Կորեայի տվյալներով՝ այսօրվա դրությամբ՝ իր հյուսիսային հարևանը կարող է տարեկան արտադրել 10-ից 20 միջուկային մարտագլխիկ։

Թարգմանությունը՝ Էմմա Չոբանյանի