Ավստրալիան արտաքսում է երկրում Իրանի դեսպանին

Ավստրալիայի կառավարությունը հայտարարել է, որ արտաքսում է Իրանի դեսպանին։ Ըստ ավստրալական կողմի՝ նա կանգնած է Մելբուռնում և Սիդնեյում հակասեմական հարձակումների հետևում, գրում է France 24-ը։

Երկրորդ համաշխարհային պատերազմից ի վեր սա առաջին դեպքն է, երբ Ավստրալիան դեսպանի է արտաքսում։ Հետախուզական ծառայությունները հանգել են «խորապես անհանգստացնող եզրակացության», որ Իրանը ղեկավարել է առնվազն երկու հակասեմական հարձակում, հայտարարել է Ավստրալիայի վարչապետ Էնթոնի Ալբանեզեն։

Նա հայտնել է, որ Թեհրանը կանգնած է Սիդնեյի Բոնդի արվարձանում գտնվող «Lewis Continental» սրճարանի հրդեհման հետևում, որտ տեղի է ունեցել 2024 թվականի հոկտեմբերին։ Հղում անելով հետախուզական տեղեկություններին՝ նա նաև ասել է, որ հենց Իրանն է կազմակերպել նաև 2024 թվականի դեկտեմբերին Մելբուռնում գտնվող «Հադաս Իսրայել» սինագոգի հրկիզումը։ Երկու հարձակումների ժամանակ տուժածներ չեն եղել։

«Սրանք արտառոց և վտանգավոր ագրեսիայի գործողություններ էին, որոնք կազմակերպվել էին օտար պետության կողմից Ավստրալիայի հողի վրա։ Դրանք սոցիալական համախմբվածությունը խաթարելու և մեր համայնքում անհամաձայնություն սերմանելու փորձ էին։ Սա բացարձակապես անընդունելի է»,- ասել է Ալբանեզեն։

Ավստրալիան Իրանի դեսպան Ահմադ Սադեղիին հայտարարել է «պերսոնա նոն գրատա» և նրան ու երեք այլ պաշտոնյաների հրահանգել է լքել երկիրը յոթ օրվա ընթացքում։ Բացի այդ, Ավստրալիան հետ է կանչել իր դեսպանին Իրանից և կասեցրել է դեսպանատան գործունեությունը Թեհրանում։

Ավստրալիացի դիվանագետները բոլորն էլ «անվտանգ են՝ երրորդ երկրում», ասել է երկրի վարչապետը։ Նա նշել է, որ Ավստրալիան նաև օրենք կընդունի Իրանի Իսլամական հեղափոխության պահապանների կորպուսն ահաբեկչական կազմակերպություն ճանաչելու մասին։

Ավստրալիայի ԱԳ նախարար Փենի Վոնգն իր հերթին նշել է, որ պատերազմից ի վեր սա առաջին դեպքն է, երբ Ավստրալիան արտաքսում է դեսպանի։

«Մենք այս որոշումը կայացրել ենք, քանի որ Իրանի գործողությունները բացարձակապես անընդունելի են»,- ասել է նա։

Վոնգը նշել է, որ երկիրը կպահպանի դիվանագիտական ​​կապերը Իրանի հետ՝ ավստրալացիների շահերը պաշտպանելու համար։

Թարգմանությունը՝ Էմմա Չոբանյանի