Ռուբիոն Ուկրաինայի ու եվրոպական երկրների ԱԳ նախարարների հետ ուկրաինական հարցն է քննարկել

ԱՄՆ-ը մտադիր է շարունակել համագործակցությունը Կիևի ու եվրոպական երկրների հետ Ուկրաինայում պատերազմը դադարեցնելու դիվանագիտական ​​ջանքերի ոլորտում՝ բանակցությունների միջոցով կայուն խաղաղ կարգավորման հասնելու համար։ Այս մասին ասվում է Պետքարտուղարության հայտարարության մեջ, որը տարածվել է ԱՄՆ պետքարտուղար Մարկո Ռուբիոյի, ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասի, մի շարք եվրոպական երկրների արտգործնախարարների և Ուկրաինայի արտգործնախարար Անդրեյ Սիբիհայի միջև հեռախոսազրույցից հետո, փոխանցում է DW-ի ռուսական ծառայությունը։

Հաղորդագրությունից հետևում է, որ զրույցին մասնակցել են Գերմանիայի, Ֆրանսիայի, Ֆինլանդիայի, Իտալիայի, Լեհաստանի ու Մեծ Բրիտանիայի ԱԳ նախարարներ Յոհան Վադեֆուլը, Ժան Նոել Բարոն, Էլինա Վալտոնենը, Անտոնիո Տայանին, Ռադոսլավ Սիկորսկին և Դեյվիդ Լամմին։

Անդրի Սիբիհայի խոսքով՝ «զրույցի հիմքը եղել են երկրների ղեկավարների միջև նախկինում կայացած շփումները, Ուկրաինայի նախագահ Վլադիմիր Զելենսկիի Վաշինգտոն կատարած հաջող այցը, ինչպես նաև ազգային անվտանգության խորհրդականների աշխատանքը»։

«Ես փոխանցեցի Ուկրաինայի դիրքորոշումը, որ անվտանգության երաշխիքները պետք է լինեն կոնկրետ, իրավաբանորեն պարտադիր և արդյունավետ։ Դրանք պետք է լինեն բազմակողմանի, ներառյալ՝ ռազմական, դիվանագիտական, իրավական և այլ մակարդակներ։ Բոլորս կիսում ենք այն համոզմունքը, որ ուկրաինական բանակը նման երաշխիքների հիմնարար մակարդակն է, ուստի դրա առավելագույն ամրապնդումը մեր գլխավոր  առաջնահերթությունն է»,- գրել է ուկրաինացի դիվանագետը X սոցիալական ցանցում։

Սիբիհան ընդգծել է, որ Կիևը «պատրաստ է հետագա քայլեր ձեռնարկել խաղաղության ուղղությամբ» և պատրաստ է «առաջնորդների մակարդակով հանդիպումների՝ ցանկացած ձևաչափով և ցանկացած աշխարհագրական շրջանում»։

Միաժամանակ, նա կոչ է արել զգալիորեն խստացնել Մոսկվայի դեմ պատժամիջոցները և ամրապնդել Ուկրաինայի ներուժը, եթե Ռուսաստանը «շարունակի հրաժարվել խաղաղության ուղղությամբ նշանակալից, կառուցողական քայլեր ձեռնարկելուց»։

Թարգմանությունը՝ Էմմա Չոբանյանի