«Զանգեզուրի անցումը» խաղաղության նախագիծ է․ Թուրքիայի, Ադրբեջանի և Հայաստանի միջև տնտեսական համագործակցությունը նոր չափում կստանա․ Էրդողան

Թուրքիայի նախագահ Ռեջեփ Թայիփ Էրդողանը հայտարարել է, որ նոր քայլեր են ձեռնարկում տրանսպորտային ներդրումների ոլորտում։ Նա հիշեցրել է, որ օգոստոսի 22-ին հիմք է դրվել Հարավային Կովկասի համար ռազմավարական առումով կարևոր նախագծի, փոխանցում է Անադոլու գործակալությունը։

Էրդողանը նշել է՝ հպարտ են Կարս-Իգդիր-Արալըք-Դիլուջու երկաթուղու շինարարության մեկնարկով, որը դուռ կբացի դեպի, այսպես կոչված, «Զանգեզուրի միջանցք»։ Թուրքիայի նախագահն ասել է, թե «Զանգեզուրի անցումը» խաղաղության նախագիծ է ամբողջ տարածաշրջանի համար։

«Նախագծի բոլոր տարրերի իրականացմամբ՝ Թուրքիայի, Ադրբեջանի և Հայաստանի միջև տնտեսական համագործակցությունը նոր չափում կստանա»,- ասել է Էրդողանը՝ հավելելով, որ այս նախագծի հիմքը հանդիսացող 224 կիլոմետրանոց Կարս-Իգդիր-Արալըք-Դիլուջու երկաթուղին կկառուցվի որպես երկկողմանի, էլեկտրաֆիկացված և ազդանշանային երկաթուղի։

Նախատեսվում է, որ դրանով տարեկան կտեղափոխվի 5,5 միլիոն ուղևոր և 15 միլիոն տոննա բեռ, և որ 2,4 միլիարդ եվրոյի նախագիծը շահագործման հանձնելով՝ Չինաստանից Մեծ Բրիտանիա միջազգային առևտրային երթուղին կդարձնի ավելի արդյունավետ։

«Նախագիծը նաև կմիացնի Կասպից և Միջերկրական ծովերի ավազանները՝ զգալի ներդրում ունենալով մեր Արևելյան և Հարավարևելյան Անատոլիայի շրջանների արտադրական հզորությունների, արտահանման և տրանսպորտային ենթակառուցվածքների զարգացման գործում: Մաղթում եմ հաջողություններ Կարս-Իգդիր-Արալըք-Դիլուջու երկաթուղային գծին, որը մեծ նշանակություն ունի ինչպես մեր երկրի, այնպես էլ մեր տարածաշրջանի համար»,- հայտարարել է Թուրքիայի նախագահը։

Հիշեցնենք, որ օրերս Թուրքիայում տեղի է ունեցել 224 կիլոմետրանոց Կարս-Իգդիր-Արալըք-Դիլուջու երկաթուղու  հիմնարկեքի արարողությունը, որը Կարս քաղաքը կապելու է Նախիջևանի հետ։ Թուրքիայի տրանսպորտի նախարար Աբդուլքադիր Ուրալօղլուն հայտարարել էր, թե այն կդառնա, այսպես կոչված, «Զանգեզուրի միջանցքի» տրանսպորտային համակարգի մաս։

Հայաստանի տարածքային կառավարման և ենթակառուցվածքների նախարար Դավիթ Խուդաթյանն էլ արձագանքել էր Ուրալօղլուի հայտարարությանը, թե, այսպես կոչված, «Զանգեզուրի միջանցք»-ը կամրապնդի Թուրքիայի, Հայաստանի և Ադրբեջանի տնտեսական համագործակցությունը։ Նա նշել էր, որ ՀՀ տարածքում կարող են գործել և իրականացվել միայն այնպիսի ենթակառուցվածքային ծրագրեր, որոնք առաջարկված, ընդունված կամ հաստատված են ՀՀ Կառավարության կողմից։

Թարգմանությունը՝ Էմմա Չոբանյանի