03.11.2026 | 23:29
Թրամփը հայտարարել է, որ ԱՄՆ-ը կդադարեցնի Իսրայելին տարեկան 4 միլիարդ դոլարի օգնության տրամադրումը
Բաքվում Արցախի ղեկավարների շինծու գործերով հերթական նիստում Արկադի Ղուկասյանի ցուցմունքներն են ներկայացվել
Քաղաքականություն
26.08.2025 | 10:26
Արցախի ղեկավարների ու տարբեր պաշտոնյաների նկատմամբ հարուցված շինծու քրեական գործերով հերթական նիստին, ադրբեջանական լրատվամիջոցների հաղորդմամբ, մասնակցել են հայ գերիները, այսպես կոչված, «տուժողներ», նրանց իրավահաջորդներն ու ներկայացուցիչները, պետական մեղադրանքին աջակցող դատախազները։ Լսվել են «տուժողների» ցուցմունքները։
Մասնավորապես, «տուժող» Սահիբ Ասկերովը հայտարարել է, թե Հայաստանի զինված ուժերի հարձակումների հետևանքով 1993 թվականին Քարվաճառից տեղահանվել է։ Նա ասել է, որ իր հարազատները վիրավորվել և զոհվել են քաղաքի վրա հարձակումների հետևանքով: Պատասխանելով գլխավոր դատախազության պետական մեղադրանքի պաշտպանության վարչության պետ Նասիր Բայրամովի հարցին՝ նա ընդգծել է, թե, իբր, Քարվաճառի բնակիչներին նույնիսկ միջանցք չի տրամադրվել տարհանման համար։
Ասկերովը նաև ասել է, թե ականատես է եղել Քարվաճառի «Թունելի» շրջանում ողբերգությանը։ Իր ցուցմունքում նա նաև հայտարարել է, թե, իբր, հակառակորդի կողմից վարձու մարտիկներ են բերվել արտասահմանից։
«Նրանք ոչնչացրել են մեր գերեզմանները, յուրացրել մեր մշակութային, պատմական և կրոնական հուշարձանները»,- ասել է նա։
Մի շարք այլ «տուժողներ» էլ են ցուցմունք տվել։ Նրանք նաև պատասխանել են հայ գերիների, նրանց փաստաբանների ու «տուժողների» ներկայացուցիչների հարցերին։
Այնուհետև դատական նիստում հրապարակվել են Արցախի նախկին նախագահ Արկադի Ղուկասյանի ցուցմունքները, որից մանրամասներ չեն հաղորդվում։
Հաջորդ դատական նիստը տեղի կունենա օգսոստոսի 28-ին։
Թարգմանությունը՝ Էմմա Չոբանյանի
