04.10.2026 | 15:18
ՆԳ նախարարն ու ղեկավար կազմը հարգանքի տուրք են մատուցել զոհված ոստիկանների հիշատակին
Իսրայելը հարվածել է Գազայի Նասեր հիվանդանոցին․ առնվազն 15 մարդ է զոհվել, այդ թվում՝ լրագրողներ․ ՏԵՍԱՆՅՈՒԹ
Քաղաքականություն
25.08.2025 | 13:50
Գազայի հատվածում Նասեր հիվանդանոցի վրա Իսրայելի հարվածների հետևանքով առնվազն 15 մարդ է զոհվել, այդ թվում՝ չորս լրագրող, որոնցից մեկն աշխատում էր Reuters-ի համար։ Այս մասին հայտնել են պաղեստինյան առողջապահության ոլորտի պաշտոնյաները, փոխանցում է Reuters գործակալությունը։
Պաշտոնյաները հայտնել են, որ առաջին հարվածի ժամանակ զոհվել է օպերատոր Հուսամ ալ-Մասրին, որը պայմանագրային հիմունքներով աշխատում էր Reuters-ի համար: Լուսանկարիչ Հաթեմ Խալեդը, որը նույնպես աշխատում էր Reuters-ի հետ, վիրավորվել է երկրորդ հարվածի ժամանակ։
Իսրայելի բանակը և վարչապետի գրասենյակը դեռևս որևէ մեկնաբանություն չեն արել հարվածների վերաբերյալ։
Ականատեսները պատմել են, որ երկրորդ հարվածը տեղի է ունեցել այն բանից հետո, երբ փրկարարները, լրագրողներն ու այլ մարդիկ շտապել են առաջին հարձակման վայր։ Հիվանդանոցից Reuters-ի համար Մասրիի ապահոված ուղիղ եթերը հանկարծակի ընդհատվել է առաջին հարվածի ժամանակ։
Գազայի առողջապահության իշխանությունները նշել են զոհված ևս երեք լրագրողի անուններ՝ Մարիամ Աբու Դագգա, Մոհամմեդ Սալամա (Al Jazeera) և Մոազ Աբու Թահա (NBC)։ Զոհվածների թվում նաև փրկարար կա։
Պաղեստինյան լրագրողների սինդիկատի տվյալներով՝ 2023 թվականի հոկտեմբերի 7-ից ի վեր Իսրայելի հարձակումների հետևանքով Գազայում զոհվել է ավելի քան 240 պաղեստինցի լրագրող։
Թարգմանությունը՝ Էմմա Չոբանյանի
