17.05.2026 | 23:35
Հենրիխ Մխիթարյանը՝ «Ինտեր» – «Վերոնա» հանդիպման լավագույն ֆուտբոլիստ․ ՏԵՍԱՆՅՈՒԹ
Ուկրաինան կրկին հարվածել է «Դրուժբա» նավթամուղին
Քաղաքականություն
22.08.2025 | 11:20
Ուկրաինայի Անօդաչու համակարգերի ուժերի հրամանատար Ռոբերտ Բրովդին հայտնել է ՌԴ Բրյանսկի մարզում գտնվող «Դրուժբա» նավթամուղի վրա հերթական հարձակման մասին, գրում է BBC-ի ռուսական ծառայությունը։
Ըստ նրա՝ ուկրաինական անօդաչու թռչող սարքերը հարվածել են «Ունեչա» նավթամղիչ կայանին, որն ուկրաինական զորքերի կողմից հարձակման էր ենթարկվել նաև օգոստոսի 13-ի գիշերը։
Բրյանսկի մարզի Ունեչայի շրջանում գտնվող «Ունեչա» կայանը «Դրուժբա» նավթամուղի ամենամեծ հանգույցն է, որի միջոցով ռուսական նավթը Եվրոպա է մատակարարվում։
Երկուշաբթի գիշերը հաղորդվել է նաև, որ Ուկրաինայի զինված ուժերը հարվածել են Տամբովի մարզում գտնվող Նիկոլսկայա նավթամուղին, որի հետևանքով խողովակաշարը փակվել էր։ Սա հաստատել էին նաև Հունգարիայի և Սլովակիայի իշխանությունները, որոնք այդ խողովակաշարով նավթ են ստանում։
Ռուսաստանի իշխանությունները չեն մեկնաբանել Բրյանսկի մարզում կրկնակի հարվածի մասին տեղեկությունը։
Նախորդ երեկոյան մարզի նահանգապետ Ալեքսանդր Բոգոմազը միայն հայտնել է, որ Սևսկի շրջանի Խինել գյուղի վրա ուկրաինական անօդաչու թռչող սարքերի հարվածի հետևանքով վիրավորվել է երկու մարդ։
Հունգարիայի ԱԳ նախարար Պետեր Սիյարտոն հայտնել է, որ «Դրուժբա»-ով նավթի մատակարարումները կրկին դադարեցվել են։
