Միքայել արքեպիսկոպոսի գործով դատավորը չասաց, թե ինչ կրոն է դավանում. պաշտպանը բացարկ հայտնեց նրան․ ՏԵՍԱՆՅՈՒԹ

Շիրակի թեմի առաջնորդ Միքայել արքեպիսկոպոս Աջապահյանի պաշտպան Երեմ Սարգսյանն այսօր բացարկի միջնորդություն ներկայացրեց գործը քննող դատավոր Արմինե Մելիքսեթյանին: Մինչև միջնորդությունը ներկայացնելը պաշտպանը դատավորից փորձեց պարզել՝ ի՞նչ կրոն է դավանում ու արդյո՞ք մկրտված է: Դատավորը, սակայն, չպատասխանեց հարցերին՝ պատճառաբանելով, որ դատարանը պարտավոր չէ պատասխանել կողմի հարցերին:

Սարգսյանն ինքնաբացարկի միջնորդությունը ներկայացնելիս նշեց, որ դատավոր Արմինե Մելիքսեթյանը կանխակալ է և շահագրգիռ, որպեսզի Միքայել սրբազանի գործն իր վարույթում մնա:

Նշենք, որ նախորդ դատական նիստի ընթացքում պաշտպանները բարձրացրել էին այն հարցը, որ Միքայել սրբազանի գործն ընդդատյա չէ Երևանի քրեական դատարանին, այսինքն՝ այն չպետք է քննվի Երևանի դատարանում: Պաշտպանները հարցումներ էին ուղարկել Gala TV և News.am լրատվականներին և պարզել, որ սրբազանը հարցազրույցները տվել է Շիրակի մարզում, այսինքն՝ Միքայել արքեպիսկոպոս Աջապահյանին վերագրվող ենթադրյալ հանցավոր արարքն ավարտվել է Շիրակի մարզում, ինչպիսի պայմաններում, ըստ գործերի ընդդատության կանոնների, գործը պետք է քննվեր Շիրակի մարզում:

Հավելենք նաև, որ ընդդատության հարցը նախնական դատալսումների ընթացքում քննվող կարևորագույն հարցերից մեկն է, և եթե պարզվի, որ գործը քննվել է ընդդատության կանոնների խախտմամբ, ապա դա դատական ակտը բեկանելու հիմք է:

Երեմ Սարգսյանը նշեց, որ օրենքի համաձայն՝ եթե դատարանը նախնական դատալսումների ընթացքում պարզում է, որ գործն ընդդատյա չէ իրեն, պետք է այն ուղարկի ըստ ընդդատության, սակայն Արմինե Մելիքսեթյանը, նախնական դատալսումների ընթացքում պարզելով, որ Միքայել արքեպիսկոպոսի գործն ընդդատյա չէ Երևանի դատարանին, մերժել էր այն ըստ ընդդատության ուղարկելու մասին պաշտպանների միջնորդությունը:

Մանրամասները՝ տեսանյութում։

Արաքս Մամուլյան