ԱՄՆ Ազգային գվարդիային Վաշինգտոնում կարող են զենք տրամադրել՝ անվտանգությունն ուժեղացնելու համար

ԱՄՆ նախագահ Դոնալդ Թրամփի նախաձեռնությամբ Վաշինգտոնում տեղակայված Ազգային գվարդիայի ստորաբաժանումները կարող են առաջիկա օրերին զենք ստանալ՝ որպես դաշնային հաստատությունների անվտանգությունն ուժեղացնելու և հանցագործությունները կանխելու միջոց: Այս մասին հաղորդում է The Washington Post-ը (WP)-ն՝ վկայակոչելով Սպիտակ տան աղբյուրներին:

ԱՄՆ մայրաքաղաքում գտնվող Ազգային գվարդիայի զինվորները, ըստ նախնական հրահանգների, անզեն են, նրանց միայն զրահաբաճկոններ են տվել: WP-ի տվյալներով՝ վարչակազմն այժմ աշխատում է ստորաբաժանումներին հրազեն տրամադրելու հարցի ուղղությամբ: Ազգային գվարդիայի անդամները պետք է ուժեղացնեն Վաշինգտոնի կենտրոնում գտնվող դաշնային կառավարության հաստատությունների և այլ օբյեկտների պաշտպանությունը, ապահովեն ոստիկանության աշխատակիցների լրացուցիչ անվտանգությունը ձերբակալությունների ժամանակ, ինչպես նաև նվազեցնեն հանցագործությունների ռիսկը քաղաքում՝ իրենց ներկայության շնորհիվ:

Վաշինգտոնում արդեն տեղակայված Ազգային գվարդիայի 800 զինվորներին կարող են միանալ ևս 750-ը: Անցած հանգստյան օրերին Օհայոյի, Հարավային Կարոլինայի և Արևմտյան Վիրջինիայի հանրապետական ​​նահանգապետերը հայտարարել են, համապատասխանաբար, 150, 200 և 400 Ազգային գվարդիայի լրացուցիչ զինվորների ուղարկելու ծրագրերի մասին:

Վաշինգտոնում երեք նահանգներից զինվորների տեղակայման ծախսերը կհոգա դաշնային բյուջեն։

ԱՄՆ նախագահ Դոնալդ Թրամփի կողմից Վաշինգտոնում Ազգային գվարդիայի ստորաբաժանումներ տեղակայելու մասին հայտարարությունից հետո, անցած շաբաթվա ընթացքում ,մայրաքաղաքում ձերբակալվել է շուրջ 300 մարդ։ Միայն շաբաթ օրը՝ օգոստոսի 16-ին, ձերբակալվել է 68 մարդ, առգրավվել է 15 ապօրինի զենք։

Բոլոր ձերբակալությունները կատարվել են ոստիկանության կողմից. Ազգային գվարդիան չի մասնակցել այդ գործողություններին։

Միաժամանակ, Ազգային գվարդիայի զորքերի գրեթե կրկնապատկման մասին լուրը Վաշինգտոնում բողոքի ցույցերի պատճառ է դարձել։ Դրանք խաղաղ են անցել, ձերբակալությունների մասին չի հաղորդվում։