12.09.2026 | 14:10
Մեկնարկել է Tour of Armenia-ի երրորդ մրցափուլը
Միքայել արքեպիսկոպոս Աջապահյանի և Սամվել Կարապետյանի իրավունքները պետք է անհապաղ վերականգնվեն. Մայր Աթոռի հայտարարությունը
Քաղաքականություն
15.08.2025 | 23:42
Մայր Աթոռը հայտարարություն է տարածել՝ անդրադառնալով Միքայել արքեպիսկոպոս Աջապահյանի և գործարար Սամվել Կարապետյանի կալանքը երկարացնելու դատարանի որոշումներին։
Հայտարարությունը ներկայացնում ենք ստորև.
«Գերաշնորհ Միքայել արքեպիսկոպոս Աջապահյանին և ազգային բարերար Սամվել Կարապետյանին կալանքի տակ պահելը երկարացնելու որոշումներով դատարանը հերթական անգամ ոտնահարեց արդարադատությունը՝ կրկին պարզորոշ դարձնելով իշխող քաղաքական ուժից դատարանների լիակատար կախվածությունը:
Նման անհիմն որոշումներով արդարադատությունը ձեռք է բերում պատժիչ նշանակություն, իսկ դատարանները վեր են ածվում ազատ խոսքի և կրոնի ազատության բռնաճնշման գործիքի:
Այսպիսի գործելաոճը բնորոշ է ամբողջատիրական համակարգերին և աղերս չունի հենց իշխանությունների կողմից տարփողվող ժողովրդավարական արժեքների հետ:
Եկեղեցու, եկեղեցականների և եկեղեցու աջակիցների նկատմամբ կիրառվող բռնաճնշումները և տեղեկատվական ահաբեկչության միջոցները չեն կարող լռեցնել խղճի և արդարության ձայնը:
Միքայել արքեպիսկոպոս Աջապահյանի և ազգային բարերար Սամվել Կարապետյանի իրավունքները պետք է անհապաղ վերականգնվեն, բացառվի ապօրինի հետապնդումը, և նրանք պետք է անհապաղ ազատ արձակվեն կալանքից»:
Հիշեցնենք, որ դատարանը Սամվել Կարապետյանի կալանքը երկարաձգել էր երկու ամսով, իսկ Միքայել արքեպիսոկոպոս Աջապահյանինը՝ 10 օրով։
