«Դրուժբա» խողովակաշարին ուկրաինական հարվածը Հունգարիային զրկել է ՌԴ-ից ստացվող նավթից

Ռուսաստանը դադարեցրել է «Դրուժբա» խողովակաշարով Հունգարիա նավթի մատակարարումը՝ Ուկրաինայի զինված ուժերի կողմից օգոստոսի 12-ին և 13-ին Բրյանսկի մարզում գտնվող հիմնական բաշխիչ կայանի վրա հարվածներից հետո, գրում է DW-ի ռուսական ծառայությունը։

Բուդապեշտը Ուկրաինայի զինված ուժերի հարձակումները համարում է հարձակում Հունգարիայի «էներգետիկ անվտանգության» և «ինքնիշխանության» վրա, հայտարարել է այդ երկրի արտաքին գործերի նախարար Պետեր Սիյարտոն:

Ակնկալվում է, որ նավթի մատակարարումները կվերսկսվեն առաջիկա ժամերին՝ հաշվի առնելով «առանց դադարի» իրականացվող վերանորոգման աշխատանքները, որոնց մասին, ըստ Սիյարտոյի, իրեն հայտնել է Ռուսաստանի էներգետիկայի փոխնախարար Պավել Սորոկինը:

Ավելի վաղ, մեկնաբանելով «Դրուժբա» բաշխիչ կայանի վրա ուկրաինական անօդաչու թռչող սարքի հարվածը, Պետեր Սիյարտոն կոչ էր արել Կիևին դադարեցնել Հունգարիա տանող էներգամատակարարման ուղիների վրա հարձակումները:

«Հունգարիան Ուկրաինայի թիվ մեկ էներգամատակարարն է։ Առանց մեզ այս երկրի էներգետիկ անվտանգությունը չափազանց անկայուն կլիներ։ Կոչ ենք անում Ուկրաինային դադարեցնել վտանգել Հունգարիայի էներգամատակարարումը մի պատերազմում, որի հետ մենք՝ հունգարացիներս, ոչ մի կապ չունենք»,- գրել է նախարարը X-ում։

«Դրուժբա»-ն Ռուսաստանի ամենամեծ խողովակաշարն է, որը նավթ է մատակարարում Եվրոպա։ Բելառուսի Մոզիր քաղաքում այն բաժանվում է հյուսիսային և հարավային գծերի։ Հյուսիսայինն անցնում է Բելառուսով, Լեհաստանով, Գերմանիայով, Լատվիայով և Լիտվայով, հարավայինը՝ Ուկրաինայով, Չեխիայով, Սլովակիայով, Հունգարիայով և Խորվաթիայով։