Կրեմլի քննադատ գրող Դմիտրի Բիկովի նկատմամբ միջազգային հետախուզում են հայտարարել

Ռուս գրող Դմիտրի Բիկովի նկատմամբ միջազգային հետախուզում է հայտարարվել, գրում է ՌԻԱ Նովոստին։

Օգոստոսի 8-ին Մոսկվայի շրջանային դատարանը հեռակա ձերբակալել է Բիկովին՝ ռազմական «կեղծիքների» գործով։ Հուլիսի 14-ին էլ Ռուսաստանի Ներքին գործերի նախարարությունը Բիկովի նկատմամբ դաշնային հետախուզում էր հայտարարել։

Ռազմական «կեղծիքների» գործից բացի՝ Բիկովի նկատմամբ հարուցվել է քրեական գործ՝ «օտարերկրյա գործակալի» պարտականությունները չկատարելու համար (Քրեական օրենսգրքի 330.1 հոդվածի 2-րդ մասը)։

Ըստ Current time-ի՝ գրողի դեմ ռուսական բանակի մասին «կեղծիքների» տարածման գործը հարուցվել է տեսահոսթինգներից մեկում տեղադրված տեսանյութի պատճառով։ «Օտարերկրյա գործակալի» պարտականությունները չկատարելու գործի պատճառ է դարձել Արդարադատության նախարարություն զեկույց չներկայացնելը։ Բիկովը «օտարերկրյա գործակալների» ռեեստրում ընդգրկվել է 2022 թվականի հուլիսին։

Դմիտրի Բիկովը քննադատում է Կրեմլի քաղաքականությունը և Ռուսաստանի կողմից Ուկրաինա լայնածավալ ներխուժումը։ Ավելի վաղ արգելել էին նրա գրքերը ցուցադրվել Մոսկվայի գրքերի տանը տեսանելի հատվածում, իսկ ACT հրատարակչությունը, “Читай-город – Буквоед” գրախանութների ցանցը և “Литрес” ծառայությունը դադարեցրել էին նրա ստեղծագործությունների վաճառքը։

2021 թվականին The Insider-ը և Bellingcat-ը համատեղ հետաքննություն են հրապարակել, որում պնդում կար, որ 2019 թվականի գարնանը Բիկովին թունավորել են։ Քննիչների կարծիքով՝ մահափորձին մասնակցել են ԱԴԾ աշխատակիցները, որոնք մասնակից են նաև Ալեքսեյ Նավալնիի և Վլադիմիր Կարա-Մուրզայի թունավորմանը։