06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Հայաստանից ևս 7 կազմակերպություն կարող է ծաղիկ արտահանել Ռուսաստանի Դաշնություն․ ՍԱՏՄ
Տնտեսություն
12.08.2025 | 13:10
Հայաստանից ևս 7 կազմակերպություն կարող է ծաղիկ արտահանել Ռուսաստանի Դաշնություն, այս մասին Factor.am-ին հայտնեց ՍԱՏՄ իրազեկման, խորհրդատվության և հանրության հետ տարվող աշխատանքների բաժնի պետ Անուշ Հարությունյանը։
ՍԱՏՄ ներկայացուցիչը մանրամասնեց, որ ընդհանուր առմամբ ստուգվել է ծաղիկ արտադրող 47 կազմակերպություն (105,4 հեկտար), որոնցից 21-ը (85,7 հեկտար) ստացել են Ռուսաստան ծաղիկ արտահանելու արտոնագիր։
Նշենք, որ ՍԱՏՄ-ի և ՌԴ անասնաբուժական և բուսասանիտարական վերահսկողության դաշնային ծառայության մասնագետ-տեսուչներն արդեն մեկ ու կես ամիս է՝ համատեղ առցանց տեսահսկողական միջոցառումներ են անցկացնում Հայաստանի ծաղիկ արտադրող ընկերությունների ջերմոցային տնտեսություններում։
Դեռ շուրջ 3 ամիս առաջ ռուսական «Ռոսսելխոզնադզոր»-ը զգուշացրել էր հայկական կողմին, որ կարող են արգելել ծաղիկների ներմուծումը երրորդ երկրներից Հայաստանով դրանցում «կարանտինային օբյեկտների» հայտնաբերման աճի պատճառով։ Հայաստանյան պատկան մարմինները, սակայն, պնդում են, որ Հայաստան երրորդ երկրից ծաղիկ չի ներմուծվում և իր տարածքով էլ ՌԴ չի արտահանվում։
Ռուսական կողմի ստուգումների խստացման հետևանքով այս ընթացքում բազմաթիվ ծաղիկ արտադրողներ բողոքում էին, որ միլիոնների վնասներ են կրել։
Խնդիրը կարգավորելու նպատակով ՍԱՏՄ ղեկավար ղեկավար Տիգրան Պետրոսյանը և ՌԴ անասնաբուժական և բուսասանիտարական վերահսկողության դաշնային ծառայության ղեկավար Սերգեյ Դանկվերտը Մոսկվայում հանդիպել էին։
Մանյա Պողոսյան
