Կոլումբիայում վախճանվել է մահափորձի ժամանակ վիրավորված նախագահի թեկնածուն

Կոլումբիայի նախագահի թեկնածու Միգել Ուրիբե Տուրբայը, որի դեմ հունիսի 7-ին մահափորձ էր իրականացվել մայրաքաղաք Բոգոտայում, օգոստոսի 11-ին մահացել է։ Այս մասին հայտնել է նրա կինը՝ Մարիա Կլաուդիա Տարասոնան, գրում է DW-ի ռուսական ծառայությունը։

Մահափորձից հետո Ուրիբեն ինը շաբաթ անցկացրել է հիվանդանոցում՝ ենթարկվելով մի քանի վիրահատության: Մեկ օր առաջ, երբ բժիշկները հայտնել էին  քաղաքական գործչի վիճակի վատթարացման և ուղեղում արյունահոսություն մասին, Տարասոնան կոլումբիացիներին կոչ էր արել աղոթել իր 39-ամյա ամուսնու ապաքինման համար:

Հունիսի 7-ին Ֆոնտիբոն շրջանի այգում նախընտրական միջոցառման ժամանակ Ուրիբեի ուղղությամբ երեք կրակոց էր արձակվել, ինչի հետևանքով նա երկու վիրավորում էր ստացել գլխին։ Քաղաքական գործիչը հոսպիտալացվել և անմիջապես վիրահատվել էր:

Մահափորձի գործով հետաքննության շրջանակում իրավապահ մարմինները ձերբակալել են չորս անձի, այդ թվում՝ կրակոցների մեջ կասկածվող 15-ամյա դեռահասի։ Բոլորին մեղադրանք է առաջադրվել սպանության փորձի և զենքի ապօրինի պահման, իսկ երեք չափահասների՝ նաև հանցագործությանը դեռահասի ներգրավման համար։

Չորսն էլ իրենց մեղավոր չեն ճանաչել, սակայն նշել են, որ գործել են կոլումբիական հանցավոր շրջանակներում հայտնի Խոսե Արտեագայի հրամանով։ Իշխանությունները նրան ձերբակալել են հուլիսի սկզբին։

Ուրիբեն քննադատել է գործող նախագահին

Միգել Ուրիբե Տուրբայը ծնվել է 1986 թվականի հունվարի 28-ին կոլումբիացի լրագրող Դիանա Տուրբայի ընտանիքում, որին 1991 թվականին առևանգել և սպանել են թմրավաճառ Պաբլո Էսկոբարի Մեդելինի կոկաինի կարտելի անդամները։ Դիանայի հայրը Խուլիո Սեզար Տուրբայ Այալան է, որը Կոլումբիայի նախագահն էր 1978-ից 1982 թվականներին։

Ուրիբեն մտադիր էր առաջադրվել նախագահի պաշտոնում 2026 թվականի ընտրություններում։