09.06.2026 | 00:17
Մարկո Ռուբիոն շնորհավորել է Փաշինյանին
Ալավերդու պղնձաձուլական գործարանի աշխատակիցները բացել են միջպետական ճանապարհը. նրանք կհանդիպեն Տիգրան Ավինյանի հետ
Հասարակություն
19.10.2018 | 15:50
Ալավերդու պղնձաձուլական գործարանի աշխատակիցների ներկայացուցիչները 10 հոգանոց խմբով գնում են ՀՀ փոխվարչապետ Տիգրան Ավինյանի հետ հանդիպման: Այս մասին Factor.am-ին տեղեկացրեց «SOS Ալավերդի» նախաձեռնության անդամ Օլեգ Դուլգարյանը:
Նշենք, որ գործարանն այսօրվանից տեխնիկապես չի աշխատում: Շուրջ 650 աշխատակիցներ գործարանի փակման դեմ բողոքի ակցիա էին կազմակերպել՝ փակելով Ալավերդի քաղաքով անցնող միջպետական ճանապարհը: Ակցիային մասնակցել է նաև գործարանի գործադիր ղեկավարությունը:
«Որքան էլ փորձեցին գործարանի փակումը դարձնել բնապահպանական խնդիրներից բխող թիրախ, իրականում խնդիրները շատ լուրջ են: Բնապահպանականից բացի՝ կա նաև ֆինանսական մենեջմենթի խնդիրը: Ֆինանսական պարտավորությունները չկատարելու պատճառով ՎՏԲ բանկը պատրաստում է վերցնել նաև պղնձաձուլական գործարանը՝ Թեղուտի հետ միասին»,- նշեց Օլեգ Դուլգարյանը:
Նրա խոսքով՝ աշխատակիցները կառավարությունից պահանջում են ամեն ինչ անել՝ ապահովելու համար գործարանի հետագա շահագործումը, ինչպես նաև թույլ չտալ, որ ՎՏԲ բանկը վերցնի այն:
Հավելենք, որ եթե պղնձաձուլական գործարանը չվերագործարկվի, 630 մարդ գործազուրկ կդառնա:
