ԱՄՆ-ն պատրաստակամություն է հայտնել մոդուլային ատոմակայանների տեխնոլոգիաներով կիսվել․ Փաշինյան

Վարչապետ Նիկոլ Փաշինյանը Դոնալդ Թրամփի և Իլհամ Ալիևի հետ հանդիպումից հետո պատասխանել է լրագրողների հարցերին։ ՀՀ-ն և ԱՄՆ-ն ստորագրել են 3 փոխըմբռնման հուշագիր, որոնցից մեկը վերաբերում է «Խաղաղության խաչմերուկ» նախագծին․ «Մտադրությունների հուշագրում ԱՄՆ-ն արտահայտել է իր հետաքրքրությունը «Խաղաղության խաչմերուկ» նախագծում ներդրումներ անելու՝ ՀՀ-ի ինքնիշխանության, տարածքային ամբողջականության, և սահմանների անխախտելիության սկզբունքների լիարժեք հարգմամբ»,- նշել է վարչապետը։ Ըստ Փաշինյանի՝ ԱՄՆ-ի հետ այս պայմանավորվածությունը լրացնելու է TRIPP նախագիծը, «որը տեղավորվում է «Խաղաղության խաչմերուկ» նախագծում»։

Երկրորդ փաստաթուղթը, որ Փաշինյանn ու Թրամփը ստորագրել են, վերաբերում է տեխնոլոգիական ոլորտին և արհեստական բանականության ոլորտի զարգացմանը։ «Ինչը ենթադրում է մեծ ներդրումներ և աջակցություն ՀՀ-ում ոլորտի զարգացմանը։ Դուք տեղյակ եք, որ Nvidia ընկերության հետ 500 միլիոն դոլարի նախագիծ արդեն իսկ իրականացվում է։ Այսօրվա ստորագրված փաստաթղթի արդյունքում, ԱՄՆ-ի կառավարությունը, իհարկե, արհեստական բանականությանն առնչվող շատ զգայուն ապրանքների արտահանման մասին է խոսքը, և ըստ էության՝ ԱՄՆ նախագահը կանաչ լույս տվեց, որպեսզի այդ սարքավորումներն արտահանվեն Հայաստան և ներդրվեն»։

Նիկոլ Փշաինյանը վստահություն է հայտնել, որ այս 500 մլն դոլարանոց ներդրման փաթեթն ընդամենը սկիզբն է․ «Քննարկում ունեցանք և ԱՄՆ մեր գործընկերներն արձանագրել են, որ ՀՀ-ում արհեստական բանականության և տեխնոլոգիական ոլորտի շատ մեծ պոտենցիալ կա»։ ԱՄՆ-ի և ՀՀ-ի միջև երրորդ փոխըմբռնման հուշագիրը վերաբերում է էներգետիկ ոլորտում երկու ուղղություններով փոխգործակցությանը․ «Դրանցից մեկը միջուկային էներգետիկայի նորագույն տեխնոլոգիաներն են և երկրորդը՝ էլեկտրաէներգիայի կուտակիչների տեխնոլոգիայի ներդրումն է ՀՀ-ում»։ Ըստ վարչապետի՝ ՀՀ-ն այս պահին երեք ատոմակայանի չափ վերականգնվող էներգետիկա ունի, սակայն կա կարիք լուծելու լիցքավորիչների խնդիրը, որի ուղղությամբ ԱՄՆ-ի հետ աշխատանք կտարվի։ «Դուք գիտեք, որ մենք շատ հետաքրքրված ենք մոդուլային ատոմակայանների տեխնոլոգիաներով։ Այդ փաստաթղթում արձանագրվել է ԱՄՆ-ի պատրաստակամությունը՝ այդ տեխնոլոգիաները կիսել մեզ հետ»,- հայտնել է Նիկոլ Փաշինյանը։