12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Պուտինը խաղաղության գործարքի դիմաց Ուկրաինայից պահանջում է հանձնել Դոնբասը․ Bloomberg
Քաղաքականություն
08.08.2025 | 21:13
ՌԴ նախագահ Վլադիմիր Պուտինը Ուկրաինայի հետ հնարավոր խաղաղության համաձայնագրի շրջանակում պահանջում է, որ Կիևն ամբողջությամբ հանձնի Դոնեցկի և Լուգանսկի մարզերի տարածքները։ Այս մասին գրում է Bloomberg-ը՝ վկայակոչելով իրազեկ աղբյուրներին, փոխանցում է DW-ի ռուսական ծառայությունը։
Գործակալության աղբյուրների համաձայն՝ Պուտինի և ԱՄՆ նախագահ Դոնալդ Թրամփի հանդիպմանն ընդառաջ նախապատրաստվող համաձայնագրի շրջանակում «Կիևը պետք է զորքերը դուրս բերի Դոնբասի այն տարածքից, որը դեռևս վերահսկում է»։ Փոխարենը Պուտինը պատրաստ է սառեցնել պատերազմը առաջնագծում և դադարեցնել հարձակումը Զապորոժիեի և Խերսոնի մարզերում։
Նախկինում Կրեմլը պնդում էր, որ այս շրջանները նույնպես անցնեն իր վերահսկողության տակ, չնայած ռուսական բանակը վերահսկում է դրանց կեսից մի փոքր ավելին։ Դեռևս պարզ չէ՝ արդյո՞ք Պուտինն ինքը կհրաժարվի գրավված որևէ տարածքից, օրինակ՝ Զապորոժիեի ատոմակայանից, որը ամենամեծն է Եվրոպայում և Ուկրաինայում, և որը պատերազմից առաջ արտադրում էր Ուկրաինայի էլեկտրաէներգիայի մոտ 20 տոկոսը։
Միաժամանակ, համաձայնագրի շրջանակում Ուկրաինան պետք է հրաժարվի նաև Ղրիմի նկատմամբ իր պահանջներից, որը Կրեմլը բռնակցել է 2014 թվականին:
Ըստ Bloomberg-ի աղբյուրների՝ ԱՄՆ վարչակազմն աշխատում է, որ նման համաձայնագիրը հավանության արժանանա Ուկրաինայի ու նրա եվրոպացի դաշնակիցների կողմից, սակայն դա դեռևս երաշխավորված չէ:
Գործակալության զրուցակիցները նշել են, որ տարածքների վերաբերյալ համաձայնագիրը պետք է ճանապարհ հարթի հրադադարի, ապա՝ վերջնական խաղաղության համաձայնագրի շուրջ տեխնիկական բանակցությունների համար: Մինչև հիմա պարզ չէ՝ արդյո՞ք Պուտինը կմասնակցի Ուկրաինայի նախագահ Վլադիմիր Զելենսկիի մասնակցությամբ եռակողմ հանդիպմանը, որն առաջարկել է Թրամփը:
Հրապարակման համաձայն՝ ԱՄՆ վարչակազմի բազմաթիվ պաշտոնյաներ կասկածում են, որ Պուտինն անկեղծորեն ձգտում է դադարեցնել պատերազմը և հետաքրքրված է խաղաղության համաձայնագրով, որը չի համապատասխանում Ուկրաինայում իր սկզբնական նպատակներին: Թրամփի նախորդ առաջարկը Պուտինին ներառում էր միայն Ղրիմի բռնակցման ճանաչում և ռազմաճակատի երկայնքով պատերազմի սառեցում:
Միաժամանակ, ըստ Bloomberg-ի, Զապորոժիեն և Խերսոնը պետք է մնան Ուկրաինայի վերահսկողության տակ:
