Իսրայելի իշխանությունները կողմ են քվեարկել Գազայի նկատմամբ ամբողջական վերահսկողությանը

Իսրայելցի ռազմաքաղաքական կաբինետը կողմ է քվեարկել Գազայի հատվածի նկատմամբ վերահսկողություն հաստատելուն։ Մինչ այժմ իսրայելական բանակը վերահսկում է Գազայիի հատվածի տարածքի ավելի քան 75%-ը:

Վարչապետ Բենիամին Նեթանյահուի աշխատակազմի տարածած հաղորդագրության համաձայն՝ պատերազմի ավարտի հինգ սկզբունք է ընդունվել, որը ներառում է Գազայի հատվածում անվտանգության իսրայելական վերահսկողություն, ՀԱՄԱՍ խմբավորման զինաթափում, բոլոր պատանդների վերադարձ, Գազայի հատվածի ապառազմականացում, ինչպես նաև քաղաքացիական կառավարման այլընտրանքի ձևավորում, որը կապված չի լինի ո՛չ ՀԱՄԱՍ-ի, ո՛չ Պաղեստինյան ազգային վարչակազմի հետ, գրում է Current time-ը։

Հաղորդվում է, որ իսրայելական բանակը կպատրաստվի Գազա քաղաքում վերահսկողության հաստատմանը՝ միաժամանակ մարդասիրական օգնություն ցուցաբերելով քաղաքացիական բնակչությանը ռազմական գործողությունների գոտիներից դուրս:

Քվեարկությունից մի քանի ժամ առաջ Բենիամին Նեթանյահուն ամերիկյան Fox News-ին տված հարցազրույցում ասել է, որ օկուպացիայից հետո Իսրայելը, իբր, մտադիր չէ քաղաքական վերահսկողություն հաստատել Գազայի նկատմամբ:

«Մենք ցանկանում ենք Գազայի հատվածի վերահսկողությունը փոխանցել քաղաքացիական կառավարմանը, նրանց, ովքեր ՀԱՄԱՍ-ի անդամ չեն և նրանց, որոնք չեն սպառնում Իսրայելին ոչնչացմամբ»,- ասել է նա։

Նիստի ֆոնին Իսրայելի բանակը Գազա քաղաքի երկու շրջանների բնակիչներին անհապաղ տարհանման կոչ է արել։

Միաժամանակ, մի շարք պետությունների կառավարություններ, այդ թվում՝ Կատարի, Եգիպտոսի, Սաուդյան Արաբիայի և Թուրքիայի, ՀԱՄԱՍ-ի զինյալներին կոչ են արել զինաթափվել, հրաժարվել Գազայի հատվածում իշխանությունից և բանակցային սեղանի շուրջ նստել՝ պատերազմն ավարտելու համար։

Ի պատասխան՝ ՀԱՄԱՍ-ի զինյալները հայտարարություն են տարածել՝ Նեթանյահուին մեղադրելով խաղաղության բանակցությունները խափանելու և այն բանի համար, որ նա պատրաստվում է« զոհաբերել» ողջ մնացած պատանդներին «անձնական շահերի համար»։