ՀՀ սպորտի և երիտասարդության հարցերի նախարարությունն առաջարկում է Հայաստանի Բռնցքամարտի ֆեդերացիայի նախագահի նոր ընտրություններ անցկացնել: Այս մասին ասված է նախարարության տարածած հաղորդագրությունում:
«Հաշվի առնելով Հայաստանի բռնցքամարտի ֆեդերացիայի (ՀՀԲՖ) նախագահի 02.08.2018 թ. կայացած ընտրություններից հետո Հայաստանի բռնցքամարտի ներկայացուցիչների կազմակերպած բողոքի ակցիաները և ՀՀ սպորտի և երիտասարդության հարցերի նախարարի պաշտոնակատար Գաբրիել Ղազարյանի՝ «Հայաստանի Հանրապետության բռնցքամարտի ֆեդերացիա» ՀԿ-ի և «Բռնցքամարտի հայկական ազգային ֆեդերացիա» ՀԿ-ի նախագահների հետ ունեցած անձնական հանդիպումները՝ ՀՀ սպորտի և երիտասարդության հարցերի նախարարությունն ուսումնասիրել է ստեղծված իրավիճակը և այն հանգուցալուծելու նպատակով առաջարկում է կազմակերպել և անցկացնել ԱԻԲԱ-ի կանոնադրությանը և ԱԻԲԱ-ի կանոններին (հոդված 37) համապատասխան ՀՀԲՖ-ի նախագահի նոր ընտրություններ՝ հաշվի առնելով Հայաստանի բռնցքամարտի բոլոր ներկայացուցիչների (ԱԻԲԱ-ի կողմից կազմակերպված միջազգային մրցաշարերին մասնակցած մարզիչներ, մարզիկներ, բռնցքամարտի վետերաններ) իրավունքներն ու շահերը և բոլորին ծանուցել ֆեդերացիայի նախագահի նոր ընտրությունների անցկացման օրակարգի, վայրի և ժամի մասին` խստորեն պահպանելով ՀՀԲՖ-ի կանոնադրության 4.2.1, 4.2.2, 10.3.3 և 10.5.3 կետերի դրույթները»,- ասված է հաղորդագրությունում:
Հիշեցնենք, որ բռնցքամարտիկները երեկ՝ հոկտեմբերի 18-ին բողոքի ակցիա էին կազմակերպել սպորտի և երիտասարդության հարցերի նախարարության մոտ՝ պահանջելով ֆեդերացիայի նախագահի նոր ընտրություններ:
Ակցիայի կազմակերպիչների պնդմամբ՝ Ֆեդերացիայի հետ կապված խնդիրներ կան, ինչի հետևանքն էլ այն է, որ բռնցքամարտի ասպարեզում ցանկալի արդյունքներ չեն արձանագրվում: Հավելենք, որ այսօր Բռնցքամարտի ֆեդերացիան համաժողով է անցկացնելու:
