Հնդկաստանի ԱԳՆ-ն ռուսական նավթի ներմուծման հետ կապված ԵՄ-ի և ԱՄՆ-ի քննադատությունը «չարդարացված» է անվանել

Հնդկաստանի իշխանությունները Ռուսաստանից նավթի ներմուծման վերաբերյալ Միացյալ Նահանգների և Եվրամիության քննադատությունը անվանել են «չարդարացված և  ոչ խելամիտ», գրում է DW-ի ռուսական ծառայությունը։

«Ինչպես ցանկացած խոշոր տնտեսություն, Հնդկաստանը կձեռնարկի բոլոր անհրաժեշտ միջոցները՝ իր ազգային շահերը և տնտեսական անվտանգությունը պաշտպանելու համար»,- հայտարարել է Հնդկաստանի ԱԳՆ-ն։

Նշվում է, որ Հնդկաստանը սկսել է նավթ ներմուծել Ռուսաստանից այն բանից հետո, երբ նրա ավանդական մատակարարները վերաուղղորդվել են դեպի Եվրոպա՝ Ուկրաինայի դեմ Ռուսաստանի լայնածավալ պատերազմի սկսվելուց հետո։ Միևնույն ժամանակ, ԱՄՆ-ն «այդ ժամանակ ակտիվորեն խրախուսում էր Հնդկաստան նման ներմուծումը՝ համաշխարհային էներգետիկ շուկաների կայունությունն ամրապնդելու համար», ասվում է հայտարարության մեջ։

Հնդկաստանի ԱԳՆ-ն նշում է, որ ռուսական նավթը ներմուծվում է, որպեսզի հնդիկ սպառողներն ունենան էներգակիրների կանխատեսելի և մատչելի գներ։ Գերատեսչությունը «ցուցիչ» է անվանել այն փաստը, որ Նյու Դելիին քննադատող երկրները շարունակում են առևտուր անել Ռուսաստանի հետ, ինչը, ի տարբերություն Հնդկաստանի, «նույնիսկ կենսական ազգային անհրաժեշտություն չէ»։

Գերատեսչությունն ընդգծում է, որ 2024 թվականին ԵՄ-ի և Ռուսաստանի միջև երկկողմ առևտրի ծավալը կազմել է 67,5 միլիարդ եվրո, իսկ 2023 թվականին այդ ցուցանիշը չորս անգամ պակաս է՝ 17,2 միլիարդ եվրո։

«Սա զգալիորեն ավելին է, քան Հնդկաստանի և Ռուսաստանի միջև այդ կամ ավելի ուշ շրջանի ընդհանուր առևտուրը։ 2024 թվականին Եվրոպա հեղուկ բնական գազի ներմուծումը փաստացի հասել է ռեկորդային 16,5 միլիոն տոննայի՝ գերազանցելով 2022 թվականին սահմանված նախորդ ռեկորդը՝ 15,21 միլիոն տոննա»,- ընդգծել է Հնդկաստանի արտաքին քաղաքական գերատեսչությունը։

Նյու Դելին հայտնել է, որ էներգակիրներից բացի՝ եվրոպական երկրները շարունակում են Ռուսաստանից գնել «պարարտանյութեր, հանքարդյունաբերական արտադրանք, քիմիական նյութեր, երկաթ և պողպատ, ինչպես նաև մեքենաներ և տրանսպորտային սարքավորումներ», մինչդեռ Միացյալ Նահանգները շարունակում է գնել ուրանի հեքսաֆտորիդ, պալադիում էլեկտրական տրանսպորտային միջոցների, պարարտանյութերի և քիմիական նյութերի արտադրության համար։

Մեկ օր առաջ ԱՄՆ նախագահ Դոնալդ Թրամփը հայտարարել էր Ռուսաստանից Հնդկաստանի կողմից ներմուծվող նավթի մաքսատուրքերի «նշանակալի» բարձրացման մասին։

«Հնդկաստանը ոչ միայն գնում է ռուսական նավթի մեծ քանակություն, այլև վաճառում է դրա մեծ մասը բաց շուկայում՝ հսկայական շահույթ ստանալու համար։ Նրանց համար միևնույն է, թե քանի մարդ է մահանում Ուկրաինայում ռուսական ռազմական մեքենայից։ Այս առումով ես զգալիորեն կբարձրացնեմ Հնդկաստանի կողմից Միացյալ Նահանգներին վճարվող մաքսատուրքերը»,- գրել է Թրամփը Truth Social սոցիալական ցանցում։

Օգոստոսի 1-ից Վաշինգտոնը Հնդկաստանի նկատմամբ սահմանել է 25% մաքսատուրք՝ առևտրային անհավասարակշռության և Մոսկվայի հետ գործարքների պատճառով: Հնդկաստանի չորս պետական նավթավերամշակման գործարանների կողմից Ռուսաստանից նավթի գնումները կասեցնելու մասին առաջին հաղորդագրություններից հետո տարբեր աղբյուրներից տեղեկություններ են հայտնվել, որ Հնդկաստանը կշարունակի ռուսական նավթ գնել՝ չնայած սպառնալիքներին։

Հուլիսի 14-ին Սպիտակ տանը ՆԱՏՕ-ի գլխավոր քարտուղար Մարկ Ռյուտեի հետ բանակցությունների ժամանակ Թրամփը հայտարարել էր, որ ԱՄՆ իշխանությունները Ռուսաստանի առևտրային գործընկերների նկատմամբ կսահմանեն 100% երկրորդային մաքսատուրքեր, եթե Ուկրաինայում խաղաղության վերաբերյալ համաձայնագիր ձեռք չբերվի առաջիկա 50 օրվա ընթացքում (մինչև սեպտեմբերի 2-ը): Հուլիսի 29-ին նա կրճատել է այս ժամկետը մինչև 10 օր:

Թարգմանությունը՝ Էմմա Չոբանյանի