Ո՞նց կարելի է խփել եկեղեցուն, անթույլատրելի է, շատ ծանր եմ տանում սրբազանների ձերբակալումը. Հեքեքյան

«Վերջին ամիսներին մեր երգչախմբով շրջագայեցինք Հայաստանի մարզերում, տեսանք և´ վերանորոգված, և´ անմխիթար վիճակում գտնվող դպրոցներ, տեսանք և´ նվիրյալ ուսուցիչների, և´ լուրջ ուսուցիչների պակաս: Մարզերում կան երեխաներ, որոնք Օպերային թատրոն չեն մտել»,- Factor TV-ի հետ զրույցում նշում է «Հայաստանի փոքրիկ երգիչներ» երգչախմբի հիմնադիր  ղեկավար, դիրիժոր Տիգրան Հեքեքյանը:

Նա վստահ է, որ եթե պետությունն արտոնի, Օպերային թատրոնի ղեկավարությունը նրանց կտրամադրի տոմսեր. «Բայց ամենամեծ խնդիրը երաժշտական դպրոցներում մանկավարժների պակասն է: Ընդ որում, դա նկատելի է ոչ միայն գյուղերում, այլև քաղաքներում: Օրինակ`Վանաձորում չունենք խմբավարներ: Ավագ սերունդը հեռանում է, համարյա մարդ չի մնում, երիտասարդներն էլ չեն ուզում քիչ փողով աշխատել»:

Դիրիժորն անդրադառնում է նաև Սայաթ-Նովայի անվան երաժշտական դպրոցի տնօրենի պաշտոնից հեռանալուն: Հարցին, թե արդյոք պաշտոնից ազատվելը կապված է   իր նկատմամբ հետապնդման հետ` քաղաքական, հասարակական ակտիվ դիրքորոշմամբ պայմանավորված, Հեքեքյանը պատասխանում է. «Դուրս եմ եկել իմ դիմումի համաձայն, հետապնդումը գուցե խիստ է ասված, բայց Երևանի քաղաքապետարանում կան մարդիկ, որոնք իրենց անձնական ամբիցիաները բավարարելու համար փորձում են քեզ ցույց տալ քո տեղը, իրենց դիրքը, ցույց տալ, թե իրենք ղեկավար են, որ ամեն ինչ իրենց ձեռքում է, և դա, ցավոք, անդրադառնում է այն հիմնարկի վրա, որտեղ աշխատում ես: Սայաթ-Նովայի դպրոցում կարևոր հաստիքներ կրճատվեցին, և երբ կրճատել առաջարկողը գալիս է դպրոց ու վերականգնվում է այդ հաստիքը, հասկանում ես, որ սա չարամտորեն կայացված որոշում էր`վնաս տալու համար»:

Տիգրան Հեքեքյանը խոսում է նաև Հայաստանի ներքաղաքական վիճակի,  իշխանություն-եկեղեցի առճակատման մասին. «Ո՞նց կարելի է խփել եկեղեցուն`մեզ միավորող ինստիտուտին, անթույլատրելի է: Շատ ծանր եմ տանում սրբազանների ձերբակալումը, հիմա կասեն`ձայնագրություն կա, թող ինձ ապացուցեն…Նշանակում են մեղավոր, տանում են փակեն, որ մաքսիմում վնաս տան, հետո ասում են`սխալ ենք արել,կներեք: Ես չեմ ասում`ձայնագրության մեջ խոսք են փոխել, բայց չեմ էլ կարող փաստել, որ նման խոսակցություն եղել է, և հարց է`ինչ կոնտեքստում է եղել»:

Մանրամասները`տեսանյութում:

Աննա Բաբաջանյան