07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
Լիտվայի վարչապետը հրաժարական է տվել կոռուպցիոն սկանդալի պատճառով
Քաղաքականություն
31.07.2025 | 18:21
Լիտվայի վարչապետ Գինտաուտաս Պալուցկասը հրաժարական է տվել կոռուպցիոն սկանդալի ֆոնին, գրում է Current time-ը։
«Պալուցկասը զանգահարել է առավոտյան և հայտարարել իր հրաժարականի մասին»,- ասել է Լիտվայի նախագահ Գիտանաս Նաուսեդան։
Նախագահը հուլիսի 24-ին Պալուցկասին երկու շաբաթ ժամանակ էր տվել իր քաղաքական ապագայի վերաբերյալ որոշում կայացնելու համար։ Հաջորդ օրը վարչապետը հայտարարել էր, որ մեկնում է «երկար ժամանակ պլանավորված արձակուրդի»։
Լիտվայի խորհրդարանի խոսնակ Սաուլիուս Սկվերնյալիսը հուլիսի 30-ին հայտարարել էր, որ «Լիտվայի համար դեմոկրատների միություն» կուսակցությունը կլքի իշխող կոալիցիան, եթե Գինտաուտաս Պալուցկասը մնա կառավարության ղեկավար։
Միաժամանակ, Պալուցկասը լքել է Լիտվայի Սոցիալ-դեմոկրատական կուսակցության նախագահի պաշտոնը, որը նույնպես մեծամասնության կոալիցիայի մաս է կազմում։
Անվտանգության ուժերը խուզարկություն են անցկացրել նրա եղբոր կնոջը պատկանող Dankora ընկերությունում։ Լրատվամիջոցները նախկինում պարզել էին, որ Dankora-ն ԵՄ-ից LEADER ծրագրի շրջանակում ստացել է գրեթե 173 հազար եվրոյի ֆինանսական աջակցություն։ Այս գումարով ընկերությունը մարտկոցային համակարգեր է գնել Garnis ընկերությունից, որի համասեփականատերը Պալուցկասն է․ նրան պատկանում է բաժնետոմսերի 49 տոկոսը։ Վերջինը մարտկոցների մատակարարման մրցույթի միակ մասնակիցն է եղել և առաջարկել է 145 հազար եվրո։
Թարգմանությունը՝ Էմմա Չոբանյանի
