Պենզայում ուկրաինական ԱԹՍ-ները, ենթադրաբար, հարձակվել են «Ռադիոգործարանի» վրա․ Կոտելնիկովոյում անօդաչուի բեկորներն ընկել են երկաթուղու գծերին․ ՏԵՍԱՆՅՈՒԹ

ՌԴ Պաշտպանության նախարարությունը հայտնել է, որ հուլիսի լույս 31-ի գիշերը (մինչև ժամը 04:00-ն) հինգ շրջանների և  բռնակցված Ղրիմի տարածքում խոցվել է 32 անօդաչու թռչող սարք, գրում է Current time-ը։

Առավոտյան Պենզայի բնակիչները հայտնել են պայթյունների մասին: Մարզի նահանգապետ Օլեգ Մելնիչենկոն գրել է, որ անօդաչու թռչող սարքերը հարձակվել են արդյունաբերական ձեռնարկություններից մեկի վրա:

«Զոհեր կամ ավերվածություններ չկան: Ձեռնարկության տարածքում հրդեհ է բռնկվել, որը ներկայում մարվում է»,- նշել է նա՝ հավելելով, որ «անվտանգության նկատառումներից ելնելով»՝ տարածաշրջանում գործում են բջջային ինտերնետի ժամանակավոր սահմանափակումներ:

Ուկրաինական  Exilenova+ տելեգրամ ալիքը գրում է, որ անօդաչու թռչող սարքերը հարձակվել են «Ռադիոգործարան»-ի վրա, որը ռադիոէլեկտրոնիկայի ոլորտի առաջատար ձեռնարկություններից է: Գործարանը «Ռոստեխ» կորպորացիայի «Ռոսէլեկտրոնիքս» հոլդինգի մաս է կազմում:

Բացի այդ, գիշերային հարձակումից հետո Վոլգոգրադի մարզի Կոտելնիկովո քաղաքում հրդեհ է բռնկվել։ Պաշտպանության նախարարությունը հայտնել է, որ տարածաշրջանի վրա խոցվել է 11 անօդաչու թռչող սարք։ Նահանգապետ Անդրեյ Բոչարովը գիշերային հարձակումն անվանել է «զանգվածային»։ Նրա խոսքով՝ թիրախը եղել են «տրանսպորտային և էներգետիկ օբյեկտները», ոչ ոք չի տուժել։

Սուրովիկինսկի շրջանում այրվել է չոր խոտ, իսկ Կոտելնիկովսկի շրջանում խափանվել է մոտ 65 մասնավոր տների գազամատակարարումը: Անօդաչու թռչող սարքի բեկորներն ընկել են երկաթուղային ենթակառուցվածքների վրա, գնացքների երթևեկությունը ժամանակավորապես սահմանափակվել է Սվետլոյարսկի շրջանի Տինգուտա կայարանի տարածքում, աշխատում են սակրավորները։

Թարգմանությունը՝ Էմմա Չոբանյանի