06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Ավելի քան 300 ԱԹՍ և 8 հրթիռ․ Կիևին ռուսական զանգվածային հարվածի հետևանքով 6 մարդ է զոհվել, 50-ից ավելին՝ վիրավորվել․ ՏԵՍԱՆՅՈՒԹ
Քաղաքականություն
31.07.2025 | 11:06
Ռուսական բանակը հուլիսի լույս 31-ի գիշերը Կիևին հարվածել է անօդաչու թռչող սարքերով և հրթիռներով։ Current time-ի փոխանցմամբ՝ զանգվածային հարվածի հետևանքով վեց մարդ է զոհվել, այդ թվում՝ 6-ամյա տղա։
Կիևի քաղաքային ռազմական վարչակազմի ղեկավար Տիմուր Տկաչենկոյի խոսքով՝ քաղաքի Սվյատոշինսկի շրջանում ավերվել է ինը հարկանի բնակելի շենքի մուտքը։
«Պետական արտակարգ իրավիճակների ծառայությունը արագորեն մաքրում է փլատակները։ Մենք պետք է հասնենք այն մարդկանց, ովքեր կարող են գտնվել ավերված մուտքի փլատակների տակ»,- գրել է նա։
Տկաչենկոն հայտնել է, որ հարձակման հետևանքները գրանցվել են Կիևի ավելի քան 27 վայրերում: Սվյատոշինսկի շրջանից բացի, տուժել են նաև Սոլոմենսկի, Շևչենկովսկի և Գոլոսեևսկի շրջանները։ Սոլոմենսկի շրջանում մահացել է երկու մարդ, Սվյատոշինսկիում՝ չորս։ 52 մարդ վիրավորվել է, որոնցից գրեթե 30-ը տեղափոխվել են հիվանդանոցներ։
«Նրանց թվում կա ինը երեխա։ Ցավոք, թիվն աճելու է»,- նշել է Տկաչենկոն։
«Հրթիռային հարձակում։ Ուղիղ բնակելի շենքի վրա։ Մարդիկ փլատակների տակ են։ Բոլոր ծառայությունները տեղում են։ Ռուս ահաբեկիչներ»,- իր հերթին սոցցանցերում գրել է Ուկրաինայի նախագահ Վլադիմիր Զելենսկին։
Նա նշել է, որ երկրի մայրաքաղաքը զանգվածային հրետակոծության հիմնական թիրախն է եղել։ Բնակարանային ենթակառուցվածքներին բազմաթիվ վնասներ են հասցվել, բազմահարկ շենքի քնելու գոտիներից մեկում ամբողջ մուտքն ավերվել է։
«Ռուսներն արձակել են ավելի քան 300 անօդաչու թռչող սարք և ութ հրթիռ»,- նշել է Ուկրաինայի նախագահը։
Նա կրկին կոչ է արել «պարտադրել Մոսկվային խաղաղության, ստիպել նստել իրական բանակցությունների սեղանի շուրջ, դրա համար բոլոր գործիքները հասանելի են գործընկերներին»։
Ռուսական կողմը դեռևս չի մեկնաբանել Կիևին հասցված զանգվածային հարվածը։
Թարգմանությունը՝ Էմմա Չոբանյանի
