06.10.2026 | 12:37
TRIPP-ի զարգացմանը զուգահեռ սպասվում է Հայաստան–Թուրքիա սահմանի բացում․ Փաշինյան
Le Figaro-ն Երևանը դասել է աշխարհի 5 վարդագույն քաղաքների շարքին
30.07.2025 | 18:24
Ֆրանսիական Le Figaro պարբերականն առանձնացրել է աշխարհի 5 վարդագույն քաղաքները։ Ցանկում ներառվել է նաև ՀՀ մայրաքաղաք Երևանը։ Ըստ պարբերականի՝ վարդագույն քաղաքների հնգյակում են նաև ֆրանսիական Թուլուզ, Ալբի, Մոնտոբան քաղաքները և Հնդկաստանի Ջայպուրը։
Նշվում է, որ Երևանն առանձնանում է իր կենտրոնի տեսողական միասնությամբ, որը փորագրված է տեղական քարից՝ հրաբխային տուֆից։ Լեռներում արդյունահանված այս քարը լինում է կարմրի երանգներով, սակայն հենց վարդագույն երանգն է գերիշխում հասարակական շենքերում և հին տներում։ Ըստ հրապարակման՝ դա կարելի է տեսնել Հանրապետության հրապարակում, հատկապես, երբ արևը մեղմ, գրեթե նարնջագույն լույս է նետում քարի վրա։
«Չնայած Երևանն աշխարհի ամենահին բնակեցված քաղաքներից մեկն է՝ հիմնադրված Հռոմից առաջ՝ մ.թ.ա. 782 թվականին, նրա «վարդագույն քաղաք» անվանումն ավելի նոր ժամանակների է՝ 20-րդ դարում խորհրդային վերակառուցման ժամանակ։ Ճարտարապետ Ալեքսանդր Թամանյանը, որը պատասխանատու էր քաղաքի վերաձևավորման համար 1920-ական և 1930-ական թվականներին, որոշեց այն դարձնել քաղաքային ներդաշնակության խորհրդանիշ՝ լայնորեն օգտագործելով այս քարը մեծ պողոտաներում և կենտրոնական հրապարակներում»,- ասվում է հրապարակման մեջ։
Թարգմանությունը՝ Էմմա Չոբանյանի
