18.12.2025 | 23:24
ՀՀ տարածքում ավտոճանապարհները հիմնականում անցանելի են
Անվճար եթեր՝ Հ1-ի «փրայմ թայմ»-ում․ ինչպես է Փաշինյանի և տիկնոջ նախագիծը հայտնվել հանրայինի եթերում. ՏԵՍԱՆՅՈՒԹ
Քաղաքականություն
29.07.2025 | 20:50
«Կրթվելը նորաձեւ է» շարժման շրջանակներում Նիկոլ Փաշինյանի հնչեցրած մտքերն արդեն քաղաքացիների լայն շրջանակի հասանելի կդառնան։ «Իմ քայլը» հիմնադրամի նախաձեռնած կրթական ներկայացվող այս արշավը հեռարձակվում է նաև հեռուստատեսությամբ։ Վարչապետի, նրա տիկնոջ ևւ այլ բանախոսների դասախոսությունները հայտնվել են պետական ֆինանսավորմամբ գործող Հանրային հեռուստաընկերության եթերում։
Ինչու և ինչ սկզբունքով է Նիկոլ Փաշինյանի և Աննա Հակոբյանի արշավը հեռարձակվում հարկատուներից միայն 2025 թվականի գործունեության համար 6 միլիարդ 578 մլն դրամ ստացած Հանրային ՀԸ-ով։ Factor TV-ի գրավոր հարցմանն ի պատասխան Հանրայինից հայտնել են, որ վարչապետի և տիկնոջ նախաձեռնությունը անվճար են հեռարձակում՝ ոչ կոմերցիոն հիմունքներով։
Ուշագրավ է, որ Փաշինյանի և Աննա Հակոբյանի նախագիծը հանրային ռեսուրսով անվճար հեռարձակվում է «փրայմ թայմին», երբ դիտողականության մակարդակը համեմատաբար բարձր է։ Թողարկումներից մեկը հեռարձակվել է հուլիսի 18-ին՝ ժամը 22:00-ի հատվածում։ Հ1-ից վստահեցնում են՝ անվճար եթերներ բազմաթիվ անգամ տրամադրել են այլ կազմակերպությունների և այլ անձանց։ Չնայած մեր ուղիղ հարցն անպատասխան են թողել, թե կոնկրետ ինչպես է որոշվել, որ Հանրայինի եթերը Փաշինյանի դասախոսության անհրաժեշտությունն ունի։
Երեւանի մամուլի ակումբի երկարամյա ղեկավար Բորիս Նավասարդյանը, թե կրթական ներկայացվող այս արշավը, թե Փաշինյանի շատ այլ գործողություններ կապում է մի քանի ամսից սպասվող խորհրդարանական ընտրությունների հետ։
Քաղաքագետ Էդգար Առաքելյանը, որ մի քանի անգամ մասնակցել է «Կրթվելը նորաձև է» հանդիպումներին, արձանագրում է՝ ընդդիմադիրներն էլ պակաս ակտիվ գործընթացներ չեն պլանավորել ընտրություններին ընդառաջ։
Բորիս Նավասարդյանը խնդրահարույց է համարում պետական բյուջեի միջոցներից ֆինանսավորվող հեռուստաընկերությամբ նման ֆորմատի հեռարձակումը։ Ըստ նրա՝ սա պետական բյուջեի հնարավորությունների օգտագործում է հօգուտ իշխող ուժի։
Քաղտեխնոլոգ Արմեն Բադալյանն էլ ասում է՝ ձևականություն կլիներ, եթե «Իմ քայլը» հիմնադրամը, լինելով նախագծի հեղինակը, Հանրային ՀԸ-ին եթերաժամանակի համար վճարեր, քանի որ, ըստ նրա, Առաջին ալիքը ծառայում է միայն Փաշինյանին։
Քաղաքագետ Էդգար Առաքելյանն այլ մոտեցում ունի․ նա դրական է համարում նախագծի հեռարձակումը Հանրայինի եթերում։
Քաղտեխնոլոգը, չնայած Հանրային ՀԸ-ի եթերաժամանակի օգտագործումը համարում է թաքնված քարոզչության դասագրքային օրինակ, միևնույն ժամանակ կարծում է, որ այն Փաշինյանի վարկանիշի վրա դրական ազդեցություն չի ունենալու։
Հիշեցնենք՝ Factor TV-ն ավելի վաղ հայտնել էր, որ «Կրթվելը նորաձև է» նախագիծը ֆինանսավորվում է նաև պետական բյուջեի՝ վարչապետին առնչվող ծախսերի տողով։ Թե որքան է հատկացվում նախագծին, կառավարությունը հրաժարվել է թվեր ներկայացնել՝ համարելով այն պետական գաղտնիք։
Մանրամասները՝ տեսանյութում։
Նարեկ Կիրակոսյան
