29.04.2026 | 17:01
ՄԱԿ-ը հայտնում է, որ Իրանում պատերազմի սկզբից ի վեր մահապատժի է ենթարկվել առնվազն 21 մարդ, ձերբակալվել՝ 4000-ը
Փեզեշքիանը հայտարարել է, որ Հայաստանը, Թուրքիան, Ադրբեջանը Իրանի հետ համագործակցության «նշանակալի ներուժ» ունեն
Քաղաքականություն
29.07.2025 | 21:27
Իրանի նախագահ Մասուդ Փեզեշքիանը հայտարարել է, որ Թեհրանը շտապ պետք է բարելավի հարաբերությունները հարևանների հետ՝ ընդգծելով, որ տարածաշրջանային ավելի ամուր կապերը կարող են օգնել չեզոքացնել Արևմուտքի պատժամիջոցները, փոխանցում է IRNA գործակալությունը։
Երկուշաբթի օրը խորհրդարանի Ազգային անվտանգության և արտաքին քաղաքականության հանձնաժողովի անդամների հետ հանդիպման ժամանակ Փեզեշքիանը նշել է, որ լիազորությունների պատվիրակումը, մասնավորապես սահմանամերձ շրջաններում, կխրախուսի տեղական պաշտոնյաներին ընդլայնել համագործակցությունը հարևան երկրների հետ։
«Եթե մենք ամրապնդենք բարիդրացիական հարաբերությունները, պատժամիջոցները կդառնան անարդյունավետ։ Այսօր ավելի քան երբևէ, մենք պետք է բարելավենք կապերը մեր հարևան և տարածաշրջանային պետությունների հետ»,-ասել է Իրանի նախագահը։
Նա նշել է երկրները, այդ թվում՝ Պակիստան, Աֆղանստան, Թուրքմենստան, Ադրբեջան, Հայաստան, Թուրքիա, Իրաք և Իրան որպես փոխադարձ համագործակցության «նշանակալի ներուժ» ունեցող երկրներ, որոնք պետք է «ակտիվանան»՝ համատեղ շահերը ապահովելու համար։
Փեզեշքիանը նաև անդրադարձել է Իսրայելի կողմից Իրանի բարձրագույն քաղաքական և ռազմական առաջնորդների գագաթնաժողովի վրա հարձակմանը հունիսյան 12-օրյա պատերազմի ժամանակ։
«Դեպքը մեզ հիշեցրել է իշխանության ապակենտրոնացման կարևորության մասին, որպեսզի եթե,Աստված մի արասցե, բարձրաստիճան պաշտոնյաների հետ ինչ-որ բան պատահի, համակարգը կարողանա շարունակել գործել», – ասել է Իրանի նախագահը։
Նա հավելել է, որ Իրանի հակառակորդները հույս ունեին, որ վերջին հարձակումները կհանգեցնեն հասարակական անկարգությունների՝ ջրի, էլեկտրաէներգիայի և հացի պակաս առաջացնելով։
«Սակայն լիազորությունները նահանգապետերին պատվիրակելով՝ այդ ջանքերը խափանվեցին», – ասել է Փեզեշքիանը՝ նշելով, որ ապակենտրոնացումը կընթանա կառավարության ընդհանուր ռազմավարական վերահսկողության ներքո։
Հիշեցնենք, որ իրանական աղբյուրները ավելի վաղ հայտնել էին, որ Մասուդ Փեզեշքիանը թեթև վիրավորում է ստացել հունիսին Իսրայելի կողմից Թեհրանի միջուկային օբյեկտների և ռազմական ենթակառուցվածքների դեմ իրականացված ռազմական գործողությունների ժամանակ։
Թարգմանությունը՝ Էմմա Չոբանյանի
