29.04.2026 | 09:07
Հայաստանն ու Վրաստանը կհյուրընկալեն ֆուտբոլի աշխարհի երիտասարդական առաջնությունը
Թրամփը հայտարարել է, որ ՌԴ-ին տված 50-օրյա վերջնագիրը կրճատում է մինչև 10-12 օրվա
Քաղաքականություն
28.07.2025 | 18:40
ԱՄՆ նախագահ Դոնալդ Թրամփը հայտարարել է Ուկրաինայում հրադադարի վերաբերյալ վերջնագիրը մինչև 10-12 օրվա կրճատելու մտադրության, փոխանցում է BBC-ի ռուսական ծառայությունը։
«Կարծում եմ՝ այսօրվանից սկսած՝ դա կլինի 10-12 օր»,- Մեծ Բրիտանիայի վարչապետ Քիր Սթարմերի հետ հանդիպմանը ասել է Դոնալդ Թրամփը՝ պատասխանելով լրագրողի հարցին, թե որքան ժամանակ է մտադիր կրճատել ՌԴ նախագահ Վլադիմիր Պուտինին Ուկրաինայի հակամարտությունը լուծելու համար տրված 50 օրը։
Թրամփը հավելել է, որ շատ առատաձեռն է եղել Պուտինի հանդեպ՝ Ռուսաստանի նախագահին տալով 50 օր։ Նա նաև նշել է, որ այլևս հետաքրքրված չէ Պուտինի հետ խոսակցություններով։
«Ես այլևս հետաքրքրված չեմ զրույցներով»,- ասել է Դոնալդ Թրամփը՝ պատասխանելով լրագրողի հարցին՝ արդյո՞ք անձնական հանդիպումը կարող է օգնել երկու նախագահների հարաբերություններին և Ուկրաինայում հրադադարին հասնելուն։
Թրամփը բացատրել է, որ ինքը բազմիցս խոսել է Պուտինի հետ, բայց բանակցություններից հետո Ռուսաստանը շարունակել է հարձակվել Ուկրաինայի վրա։
Սթարմերի հետ հանդիպումից առաջ Թրամփը հայտարարել էր, որ շատ հիասթափված է Պուտինից և մտադիր է կրճատել ժամկետը «մինչև ավելի փոքր թիվ»։
Ավելի վաղ այսօր Կրեմլի խոսնակ Դմիտրի Պեսկովը հայտարարել էր, որ Պուտինի և Թրամփի հնարավոր հանդիպման նախապատրաստական աշխատանքներ չեն տարվում, սակայն եթե նախագահները նույն քաղաքում լինեն, տեսականորեն հանդիպում կարող է կազմակերպվել։
Թարգմանությունը՝ Էմմա Չոբանյանի
