06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Հիասթափված եմ Պուտինից․ Թրամփը հայտնել է Պուտինին տրված 50-օրյա ժամկետը կրճատելու մասին
Քաղաքականություն
28.07.2025 | 17:34
ԱՄՆ նախագահ Դոնալդ Թրամփը հայտարարել է, որ կրճատելու է Ուկրաինայի պատերազմը դադարեցնելու համար ՌԴ նախագահ Վլադիմիր Պուտինին տրված 50-օրյա ժամկետը, գրում է The Telegraph-ը։
ԱՄՆ նախագահը սպառնացել էր «շատ խիստ» մաքսատուրքեր սահմանել Ռուսաստանի հիմնական առևտրային գործընկերների նկատմամբ, եթե Պուտինը չհամաձայնվի հրադադարի մինչև սեպտեմբերի 5-ը։
«Ես հիասթափված եմ նախագահ Պուտինից։ Մենք կարծում էինք, որ այդ հարցը բազմիցս կարգավորել ենք, իսկ հետո նախագահ Պուտինը դուրս է գալիս և սկսում է հրթիռներ արձակել Կիևի նման որևէ քաղաքի վրա և սպանում բազմաթիվ մարդկանց ծերանոցում կամ այլուր։ Ես նրան տված 50 օրը կրճատելու եմ, քանի որ կարծում եմ՝ արդեն գիտեմ, թե ինչ է լինելու»,- ասել է Թրամփը Մեծ Բրիտանիայի վարչապետ Քիր Սթարմերի հետ հանդիպումից առաջ։
Թրամփը սպառնացել էր այս ամսվա սկզբին 100 տոկոսանոց մաքսատուրքեր սահմանել Ռուսաստանի հիմնական առևտրային գործընկերների, այդ թվում՝ Չինաստանի և Հնդկաստանի նկատմամբ։ Նա հայտարարությունն արել էր այն բանից հետո, երբ բացահայտել է, որ ՆԱՏՕ-ի միջոցով Ուկրաինային միլիարդավոր դոլարների զենք է վաճառելու։
Հուլիսի 23-ին Ստամբուլում տեղի ունեցավ ուղիղ բանակցությունների երրորդ փուլը, որն առաջին նմանատիպ հանդիպումն էր ավելի քան մեկ ամսվա ընթացքում։
Այնուամենայնիվ, ինչպես նախորդ երկու հանդիպումները, բանակցությունները գործնականում ոչ մի արդյունք չեն տվել՝ բացի գերիների փոխանակման և մահացածների մարմինների հայրենադարձման վերաբերյալ համաձայնությունից։
Կրեմլը բացառել է Պուտինի և Ուկրաինայի նախագահ Վլադիմիր Զելենսկիի հանդիպումը, բայց հայտարարել, որ Ռուսաստանի նախագահը կարող է հանդիպել Թրամփի հետ Պեկինում սեպտեմբերին։
Թարգմանությունը՝ Էմմա Չոբանյանի
