«Բարձրաձայն ծիծաղում եմ…». Բագրատ արքեպիսկոպոս Գալստանյանը` իր դեմ նախապատրաստվող խմբային հայցի մասին

Սրբազան Պայքարի առաջնորդ Բագրատ արքեպիսկոպոս Գալստանյանը նամակը է հրապարակել ԱԱԾ շենքում գտնվող «Երևան-Կենտրոն» ՔԿՀ-ից։ Նա անդրադարձել է Առողջապահության նախարար Անահիտ Ավանեսյանի կողմից պատրաստվող խմբային հայցին։

Հիշեցնենք՝ հայցը վերաբերում է ՔԿ-ի հրապարակած ձայնագրության մեջ Բագրատ Գալստանյանի կողմից օգտագործված «խոր անասուն ազգ» արտահայտությանը։

«Ժողովրդի հասցեին անպարկեշտ արտահայտությունների մասով մենք ևս վիրավորած ենք զգում. ինձ նման հազարավոր մարդիկ կան, որ վիրավորված են զգում»,- անդրադառնալով Բագրատ Գալստանյանի դեմ խմբային հայցին՝ ասել է Ավանեսյանը։

«Զավեշտի թագուհին…

Փաստաբանիցս՝ պարոն Խուդոյանից տեղեկացա, որ տեղեկատվական ահաբեկչությամբ զբաղվող խմբի ոչ այնքան կարկառուն, բայց կարկառուն դառնալու հավակնություններ և ձգտումներ դրսևորող անդամներից առողջապահության դեռևս «նախարար» Անահիտ Ավանեսյանը ինչ որ դատական գործընթաց է սկսում իմ դեմ «ժողովրդին վիրավորելու» պատրվակով։

Բարձրաձայն ծիծաղում եմ…

Նախ՝ տիկին Ավանեսյանին խորհուրդ կտայի իր «ողբացյալ» նախորդի՝ Ա.Թ.-ի հետ պարզել վերջապես COVID-ի գործն ու՞ր հասավ…

Սակայն գրությանս պատճառը սա չէր։ Պարզապես ցանկանում եմ խորհուրդ տալ, եթե կուզեք պահանջել, որ տիկին Ավանեսյանը ժամանակ գտնի և ընթերցի (ՖԲ ստատուսներից բացի նաև ինչ-որ լուրջ բան կարդա) իմ հեղինակած «Հայաստանի առողջապահական համակարգը. անցյալը, ներկան և հեռանկարները (կենսաբարոյաբժշկական և աստվածաբանական հայացք)» գիրքը։ Եթե չկարողանա այն գտնել, ապա վստահաբար կարող է ձեռքբերել Մոնրեալի Concordia համալսարանի գրադարանից Google-ի միջոցով։ “The healthcare system of Armenia : past, present and perspectives (biomedical, ethical and theological view)”:

Գուցե մի փոքր օգուտ կքաղեք ոլորտը վերջնականապես կործանելուց առաջ։

Իսկ, որ դատվելու եք՝ դա անխուսափելի է, քանզի

Հաղթանակն այլընտրանք չունի…

Հ.Գ. Մի փոքրիկ խրատ էլ Աստվածաշնչից.

«Մի ունեցիր բանսարկուի համբավ և քո լեզվով չարիք մի նյութիր, որովհետև գողի վրայից անպակաս է ամոթը, երկերեսանու վրայից՝ չար պարսավանքը։ Անխոհեմ մի եղիր ո՛չ մեծ և ո՛չ փոքր բաների մեջ»։ Սիրաքի Իմաստություն 5։16-18

Կենսաբժշկաբարոյական գիտությունների թեկնածու
(MA in Biomedichal ethics)
Հայրենիքի կալանավոր
Բագրատ արք. Գալստանյան»,-նշել է նա իր նամակում։