Իրանն ու ԵՄ-ն «լուրջ, անկեղծ» քննարկումներ են անցկացրել․ Իրանի ԱԳ փոխնախարար

Եվրոպական եռյակի (Գերմանիա, Ֆրանսիա, Մեծ Բրիտանիա) հետ բանակցություններում Իրանի պատվիրակության անդամ, իրավական և միջազգային հարցերով փոխարտգործնախարար Քազեմ Ղարիբաբադին մանրամասներ է հայտնել Ստամբուլում անցկացված միջուկային բանակցություններից, գրում է IRNA-ն։

Նա նշել է, որ Իրանն ու եվրոպական եռյակը լուրջ բանակցություններ են վարել «կոնկրետ գաղափարներով»։

«Արտգործնախարարի տեղակալ Մաջիդ Թախտ Ռավանչիի հետ միասին մենք լուրջ, անկեղծ և մանրամասն քննարկում ենք անցկացրել E3/EU հետ։ Քննարկվել և վերանայվել են պատժամիջոցների վերացման և միջուկային հարցի վերաբերյալ վերջին զարգացումները»,- գրել է Ղարիբաբադին իր X էջում։

Իրանի փոխարտգործնախարարն ասել է, որ իրանական կողմը «լուրջ» քննադատել է եվրոպացիների դիրքորոշումը Իսրայելի ռեժիմի և Միացյալ Նահանգների կողմից Իրանի ժողովրդի դեմ վերջերս սանձազերծված ագրեսիայի վերաբերյալ և բացատրել է Իրանի սկզբունքային դիրքորոշումները, այդ թվում, այսպես կոչված, «հետադարձ կապի մեխանիզմի» վերաբերյալ։

«Երկու կողմերն էլ հանդիպմանը եկել են կոնկրետ գաղափարներով, որոնց տարբեր կողմերը քննարկվել են։ Պայմանավորվածություն է ձեռք բերվել, որ այս հարցի շուրջ խորհրդակցությունները կշարունակվեն»,- նշել է նա։

Հանդիպումից առաջ Իրանի րտաքին գործերի նախարարության խոսնակ Էսմայիլ Բաղային IRNA-ին ասել էր, որ Իրանի և Մեծ Բրիտանիայի, Ֆրանսիայի և Գերմանիայի կազմի մեջ մտնող E3-ի միջև հանդիպումը արժեքավոր հնարավորություն է ներկայացնում երեք եվրոպական երկրների համար՝ վերանայելու իրենց դիրքորոշումը Իրանի միջուկային հարցի վերաբերյալ և ծառայում է որպես այս հարցի վերաբերյալ իրենց իրատեսության ստուգում։

Եվրոպական եռյակը 2015 թվականին կնքված Իրանի միջուկային համաձայնագրի մաս է կազմում, որը պաշտոնապես անվանվել է համապարփակ գործողությունների ծրագիր։

Հավելենք, որ Ստամբուլում բանակցությունները տեղի են ունեցել Իրանի գլխավոր հյուպատոսությունում։

Թարգմանությունը՝ Էմմա Չոբանյանի