Ստամբուլում մեկնարկել են Իրանի և Ֆրանսիայի, Գերմանայի, Բրիտանիայի միջև միջուկային բանակցությունները․ ՏԵՍԱՆՅՈՒԹ

Ստամբուլում մեկնարկել են Իրանի ու «եվրոպական եռյակի» (Մեծ Բրիտանիա, Ֆրանսիա, Գերմանիա) միջև իրանական միջուկային ծրագրի շուրջ բանակցությունները։ TRT Haber-ի հաղորդմամբ՝ դրանք անցկացվում են Ստամբուլում գտնվող Իրանի գլխավոր հյուպատոսությունում։

Պատվիրակությունները տեղափոխող մեքենաները մտել են Իրանի գլխավոր հյուպատոսության տարածք։ Բանակցություններն ընթանում են փակ դռների ետևում։

Իրանական կողմից բանակցություններին մասնակցում են իրավական և միջազգային հարցերով փոխարտգործնախարար Քազեմ Ղարիբաբադին և քաղաքական հարցերով փոխարտգործնախարար Մաջիդ Թախտ-Ռավանչին։

«Վաղվա բանակցությունները նախորդ քննարկումների շարունակությունն են, և աշխարհը պետք է իմանա, որ մեր դիրքորոշումները չեն փոխվել՝ մենք կպաշտպանենք Իրանի ժողովրդի իրավունքները»,- ավելի վաղ հայտարարել էր Իրանի ԱԳ նախարար Աբբաս Արաղչին։

Նա նշել է, որ հատկապես Իսրայելի կողմից վերջերս պարտադրված պատերազմից հետո անհրաժեշտ է, որ մյուս կողմը տեղեկացվի, որ Իրանի դիրքորոշումը մնում է ամուր և անսասան։

«Մեր ուրանի հարստացումը կշարունակվի. մենք չենք հրաժարվում Իրանի ժողովրդի այս իրավունքից»,- ընդգծել է նա։

E3 խումբը, որը կազմված է Մեծ Բրիտանիայից, Ֆրանսիայից և Գերմանիայից, որոնք հայտնի են որպես Իրանի հետ համաձայնագրի եվրոպական կողմ, մայիսի 16-ին Ստամբուլում հանդիպել էին փոխարտգործնախարարների մակարդակով։ Կողմերը համաձայնել են շարունակել շփումները՝ ԱՄՆ-ի և Իրանի միջև ընթացող անուղղակի բանակցություններին զուգահեռ։

Թարգմանությունը՝ Էմմա Չոբանյանի