16.07.2026 | 18:35
Վահագն Խաչատուրյանն ընդունել է Հայաստանում Ղազախստանի դեսպան Բոլատ Իմանբաևին
Տեղումների կրճատումը և ջրային պաշարների նվազումը բարձրացնում են ջրային սեկտորի խոցելիությունը․ ՇՄ նախարար
Քաղաքականություն
25.07.2025 | 15:02
Ալթայի Հանրապետությունում անցկացվող «Բնության և շրջակա միջավայրի պահպանությանը նվիրված միջազգային համաժողովի» շրջանակում մասնակցեցի «Ինչպես պահպանել համաշխարհային ջրային բալանսը» խորագրով փորձագիտական նստաշրջանին։ Այս մասին գրել է Շրջակա միջավայրի նախարար Համբարձում Մաթևոսյանը:
Նիստին ներկա են եղել նաև Ռուսաստանի, Ղազախստանի, Ղրղզստանի, Բելառուսի, Տաջիկստանի, Ուզբեկստանի և Թուրքմենստանի ներկայացուցիչները։
«Իմ ելույթում անդրադարձա կլիմայի փոփոխության բացասական հետևանքներին ջրային ռեսուրսների վրա և ընդգծեցի, որ Հայաստանի լեռնային էկոհամակարգերը առավել խոցելի են կլիմայական փոփոխությունների պայմաններում։ Տեղումների կրճատումը և ջրային պաշարների նվազումը բարձրացնում են ջրային սեկտորի խոցելիությունը։
Ներկայացրի մեր ձեռնարկած քայլերը՝
- ջրախնայող տեխնոլոգիաների և կաթիլային ոռոգման համակարգերի ներդրում,
- ջրային համակարգերում կորուստների նվազեցման ծրագրեր,
- ջրային ռեսուրսների կառավարման օրենսդրական բարեփոխումներ,
- Հայաստանի կառավարության կողմից կլիմայի փոփոխության հարմարվողականության ազգային հնգամյա ծրագրի (2022–2026 թթ.) հաստատում՝ ուղղված ջրային ռեսուրսների ոլորտում կլիմայական ռիսկերի նվազեցմանը և հարմարվողականության ռազմավարությունների արդյունավետ իրագործմանը
- Շեշտեցի նաև Սևանա լճի ջրային հավասարակշռության պահպանումը և էկոհամակարգերի վերականգնումը՝ որպես առաջնահերթություն։
Համաժողովի ընթացքում կարևորեցի միջազգային համագործակցության և փորձի փոխանակման անհրաժեշտությունը։ Այս համատեքստում առանձնացրի 2026 թվականին Հայաստանում կայանալիք Կենսաբազմազանության մասին կոնվենցիայի կողմերի համաժողովի 17-րդ հանդիպումը (COP17)՝ գործընկերներին հրավիրելով ակտիվ մասնակցության։
Վստահ եմ, որ համատեղ ջանքերի և միջազգային գործընկերների աջակցության շնորհիվ մենք կարող ենք ձևավորել ջրային ռեսուրսների կառավարման արդյունավետ և կայուն համակարգ, որը կծառայի ինչպես մեր երկրի, այնպես էլ ողջ տարածաշրջանի զարգացմանը»,- գրել է ՇՄ նախարարը։
