12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Բրյուսելը Պեկինին կոչ է անում ազդել ՌԴ-ի վրա՝ դադարեցնելու Ուկրաինայի պատերազմը․ ԵՄ-ն ու Չինաստանը գագաթնաժողով են անցկացրել
Քաղաքականություն
24.07.2025 | 20:42
Չինաստանը և ԵՄ-ն մեկօրյա գագաթնաժողով են անցկացրել՝ հույս ունենալով լուծել մի շարք հարցերի շուրջ վեճերը, որոնցից գլխավորը հսկայական առևտրային անհավասարակշռությունն է, գրում է Euronews-ը։
ԵՄ առաջնորդները Պեկինում մեկօրյա գագաթնաժողովի ժամանակ հանդիպել են Չինաստանի նախագահ Սի Ցզինպինի և երկրի այլ բարձրաստիճան պաշտոնյաների հետ։ Նրանք քննարկել են կլիմայական համագործակցությունը և գլոբալ հակամարտությունները, սակայն հանդիպման հիմնական հարցը հսկայական առևտրային դեֆիցիտն է եղել։
Չինաստանի առաջնորդը պաշտպանել է կապերի և փոխադարձ վստահության ամրապնդումը՝ կայունություն ապահովելու համար։
«Որքան լուրջ և բարդ է միջազգային իրավիճակը, այնքան ավելի պետք է Չինաստանն ու ԵՄ-ն ակտիվացնեն շփումը, ամրապնդեն փոխադարձ վստահությունը և խորացնեն համագործակցությունը»,- ասել է նա։
Եվրահանձնաժողովի նախագահ Ուրսուլա ֆոն դեր Լեյենը կոչ է արել «կոնկրետ լուծումներ» գտնել երկկողմ հարաբերությունները բարելավելու համար, որոնք, նրա խոսքով, հասել են «շրջադարձային կետի»։ Միաժամանակ, Եվրոպական խորհրդի նախագահ Անտոնիո Կոշտան կոչ է արել Չինաստանին օգտագործել իր ազդեցությունը Ռուսաստանի վրա՝ Ուկրաինայում պատերազմը դադարեցնելու համար։
Նախատեսվում էր, որ Ֆոն դեր Լեյենը և Կոշտան նաև պետք է բարձրացնեին չինական կիբերհարձակումների և լրտեսության, հազվագյուտ հանքանյութերի արտահանման սահմանափակումների, ինչպես նաև Սինցզյան-Ույղուրական ինքնավար շրջանում, Տիբեթում և Հոնկոնգում մարդու իրավունքների հետ կապված մտահոգությունների հետ կապված հարցեր։
Սկզբում բանակցությունները նախատեսված էին երկու օր, սակայն կրճատվել էին տնտեսական անորոշության, Մերձավոր Արևելքում և Ուկրաինայում պատերազմների և ԱՄՆ-ի կողմից մաքսատուրքերի սպառնալիքի պատճառով։
Ավելին, վերլուծաբանները նշում են, որ Եվրոպան զգույշ է՝ խուսափելով չափազանց սերտ համագործակցությունից Չինաստանի հետ՝ վախենալով Դոնալդ Թրամփին զայրացնել, ինչը միայն դժվարացրել է գագաթնաժողովի անցկացումը։
«Չինաստանը Թրամփի հետ առևտրային առճակատումից բավականին լավ դուրս է եկել։ Սա նվազեցրել է ԵՄ-ի կողմից զիջումների նկատմամբ նրա ախորժակը։ Այժմ, երբ Թրամփը նահանջել է, Չինաստանն ավելի քիչ անհրաժեշտություն է տեսնում Եվրոպային սիրաշահելու»,- ասել է Եվրոպական քաղաքականության կենտրոնի գլխավոր տնտեսագետ Ֆաբիան Զուլեգը։
Չինաստանը ԵՄ-ի երկրորդ խոշորագույն առևտրային գործընկերն է ԱՄՆ-ից հետո։ Չնայած երկու կողմերն էլ հույս ունեն օգտագործել իրենց տնտեսական կապերը համաշխարհային տնտեսությունը կայունացնելու համար, հիմնարար տարաձայնությունները մնում են։
Թարգմանությունը՝ Էմմա Չոբանյանի
