Թեհրանն այլևս ջուր չունի, իրավիճակը լուրջ է․ Փեզեշքիանը չի բացառել Իրանի մայրաքաղաքի տեղափոխումը

Թեհրանը բախվում է ջրի այնպիսի լուրջ պակասի, որ նրա 15 միլիոն բնակչությունը կարող է ստիպված լինել տեղափոխվել: Asr-Iran-ի փոխանցմամբ՝ այս մասին հայտարարել է Իրանի նախագահ Մասուդ Փեզեշքիանը, փոխանցում է dpa գործակալությունը։

«Իրավիճակը լուրջ է, Թեհրանն իրականում այլևս ջուր չունի»,- ասել է Փեզեշքիանը։

Նա նշել է, որ չի կարելի բացառել մայրաքաղաքի տեղափոխումը՝ որպես արտակարգ լուծում։

Իրանում ջրային ճգնաժամ է երկրի 31 նահանգներից ավելի քան 20-ում։ Պետական IRNA լրատվական գործակալությունը հաղորդել է, որ ամենամեծ ջրամբարներից մեկը կարող է լիովին չորանալ առաջիկա չորս շաբաթվա ընթացքում։ Երկրի յոթ ջրամբարներում ջրի մակարդակը նվազել է մինչև 10%-ից պակաս, հարավային Հորմոզգան և Ֆարս նահանգներում գտնվող երկու ամբարտակներն ամբողջությամբ չորացել են, իսկ երկրի ջրամբարների 80%-ը գրեթե դատարկ է։

Կլիմայագետները նշում են, որ նորմալ ջրամատակարարումը հնարավոր չի լինի հաջորդ երկու ամիսների ընթացքում, մինչև տարվա վերջում տեղումները չմեղմացնեն իրավիճակը։

Փեզեշքիանը որպես ներկայիս ճգնաժամի պատճառներից մեկը նշել է տարիների երաշտը, բայց նաև քննադատել կառավարության նախկին քաղաքականությունը, որը, նրա խոսքով, անտեսել է խնդիրը։

Ճգնաժամի պատճառով պետական գրասենյակներն ու դպրոցները փակ կմնան առնվազն մինչև շաբաթ օրը։ Էներգամատակարարման պակասի և ճգնաժամի պատճառով շատ գործարաններ փակվել են, և սպասվում են զանգվածային կրճատումներ։

Քննադատները մեղադրում են կենտրոնական կառավարությանը և նահանգային վարչակազմերին եղանակային մարտահրավերների հետ կապված անարդյունավետ կառավարման մեջ։ Թեհրանի շատ բնակիչներ արդեն լքել են մայրաքաղաքը դեպի Կասպից ծովի հյուսիսային նահանգներ, որոնք մատակարարման խնդիրներ չունեն։

Թարգմանությունը՝ Էմմա Չոբանյանի