20.08.2026 | 23:01
«Նոան» նոր գլխավոր մարզիչ ունի
ԵՄ օժանդակությամբ մեկնարկել է նոր տեխնիկական աջակցության առաքելություն․ ՄՊՀ
24.07.2025 | 15:56
Հայաստան-ԵՄ համապարփակ և ընդլայնված գործընկերության համաձայնագրի /CEPA/ՀԸԳՀ/ ներքո իրականացվող սպառողների շահերի պաշտպանության բարեփոխումների համատեքստում մեկնարկել է նոր տեխնիկական աջակցության առաքելություն՝ ԵՄ կողմից ֆինանսավորվող «Աջակցություն ՀԸԳՀ մշտադիտարկմանը, իրականացմանը և հաղորդակցությանը» ծրագրի շրջանակներում։ Այս մասին հաղորդում է Մրցակցության պաշտպանության հանձնաժողովը։
Նշվում է, որ «Աջակցություն սպառողների շահերի պաշպանության օրենսդրության մոտարկմանը 2» առաքելությունն իրականացվել է Լեհաստանի մրցակցության և սպառողների շահերի պաշտպանության գրասենյակի (UOKiK) փորձագետների կողմից։
«Այցի ընթացքում Մրցակցության պաշտպանության հանձնաժողովում կազմակերպվել են աշխատանքային քննարկումներ, որոնց մասնակցել են ծրագրի պատասխանատուներ և փորձագետներ, շահագրգիռ գերատեսչությունների, այդ թվում՝ արդարադատության, էկոնոմիկայի նախարարությունների ներկայացուցիչներ։
ՄՊՀ անդամ Շուշան Սարգսյանը շնորհակալություն է հայտնել սպառողների պաշտպանության օրենսդրության բարեփոխումներին շարունակական աջակցության համար՝ հավելելով, որ այն գործնականում արդեն իսկ ցույց է տվել իր հաջողված արդյունքները։ Մասնավորապես առաջին տեխնիկական աջակցության առաքելության շրջանակում միջազգային փորձագետների ներկայացրած առաջարկությունների հաշվառմամբ մշակված օրենսդրական փաթեթը հուլիսի 3-ին ընդունվել է Ազգային ժողովի կողմից և ուժի մեջ կմտնի օգոստոսի 1-ից։
Օրենսդրական բարեփոխումների երկրորդ փաթեթով նախատեսվում է փորձագիտական թիմի աջակցությամբ մշակել փոփոխություններ՝ սպառողական պայմանագրերում անարդար պայմանների, մոլորեցնող և համեմատական գովազդի, սպառողների իրավունքների, ապրանքի վաճառքի պայմանագրերի վերաբերյալ ԵՄ դիրեկտիվներին համահունչ։
Հանդիպումների ընթացքում փորձագետներին ներկայացվել են իրականացված աշխատանքների ընթացքը, վեր են հանվել գործընթացի առկա հարցերը և հստակեցվել հետագա գործողությունները»,- գրված է հաղորդագրության մեջ։
