06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Ավելի քան 100 մարդասիրական կազմակերպություններ զգուշացնում են Գազայում «զանգվածային սովի» մասին
Քաղաքականություն
23.07.2025 | 17:39
Ավելի քան 100 մարդասիրական կազմակերպություններ զգուշացրել են, որ Գազայի հատվածում տարածվում է «զանգվածային սով», և որ իրենց գործընկերները տառապում են սննդի սուր պակասից, գրում է France 24-ը։
Իսրայելը բախվում է միջազգային ճնշման՝ Պաղեստինի տարածքում ստեղծված աղետալի մարդասիրական իրավիճակի պատճառով, որտեղ ավելի քան երկու միլիոն մարդ 21 ամիս տևած ավերիչ հակամարտության մեջ է։ Նույնիսկ այն բանից հետո, երբ Իսրայելը մայիսի վերջին սկսել է մեղմացնել ավելի քան երկու ամիս տևած օգնության շրջափակումը, Գազայի բնակչությունը դեռևս տառապում է սննդի և այլ անհրաժեշտ իրերի ծայրահեղ պակասից, և բնակիչները հաճախ զոհվում են՝ փորձելով հավաքել օգնություն մի քանի բաշխման կետերում։
Հայտարարությունը ստորագրողները, այդ թվում՝ «Բժիշկներ առանց սահմանների» (MSF), «Փրկեք երեխաներին» և Օxfam կազմակերպությունները, զգուշացրել են՝ «մեր գործընկերները և նրանք, ում մենք սպասարկում ենք, հյուծվում են»։
«Քանի որ Իսրայելի կառավարության կողմից պաշարումը Գազայի բնակչությանը սովամահ է անում, մարդասիրական աշխատողներն այժմ միանում են նույն սննդի հերթերին՝ վտանգվելով իրենց կյանքը միայն իրենց ընտանիքներին կերակրելու համար»,- ասվում է հայտարարության մեջ։
Խմբերը կոչ են արել անհապաղ բանակցային հրադադարի, բոլոր ցամաքային անցակետերի բացման և ՄԱԿ-ի գլխավորած մեխանիզմների միջոցով օգնության ազատ հոսքի։
Հայտարարությունը հրապարակվել է մեկ օր անց այն բանից հետո, երբ ԱՄՆ-ը հայտարարել է, որ իր դեսպան Սթիվ Ուիթկոֆն այս շաբաթ կմեկնի Եվրոպա՝ Գազայի հարցով բանակցությունների, իսկ հետո, հնարավոր է, Մերձավոր Արևելք։ Ուիթկոֆը գալիս է «հզոր հույսով, որ մենք կառաջարկենք ևս մեկ հրադադար, ինչպես նաև մարդասիրական միջանցք՝ օգնության հոսքի համար, որի վերաբերյալ երկու կողմերն էլ իրականում համաձայնվել են», լրագրողներին ասել է Պետքարտուղարության խոսնակ Թեմմի Բրյուսը։
Հայտարարության մեջ մարդասիրական օգնության գործակալությունները նշել են, որ տոննաներով պարենամթերք պարունակող պահեստները մնացել են անձեռնմխելի թե՛ տարածքից դուրս, թե՛ ներսում, քանի որ դրանց մուտքը կամ դրանց առաքումը արգելափակված է եղել։
«Պաղեստինցիները հույսի և վշտի շրջապտույտի մեջ են՝ սպասելով օգնության և հրադադարի, միայն թե արթնանալով տեսնեն, որ իրավիճակը վատթարանում է։ Սա ոչ միայն ֆիզիկական տառապանք է, այլև հոգեբանական։ Գոյատևումը կախված է օդում։ Մարդասիրական համակարգը չի կարող գործել կեղծ խոստումների հիման վրա։ Մարդասիրական գործիչները չեն կարող գործել փոփոխվող ժամանակացույցերով կամ սպասել քաղաքական պարտավորությունների, որոնք չեն ապահովում հասանելիություն»,- նշում են հայտարարությունը ստորագրողները։
ՄԱԿ-ի գլխավոր քարտուղար Անտոնիո Գուտերեշը երեքշաբթի հայտարարել է, որ Իսրայելի ռազմական հարձակման տակ Գազայում պաղեստինցիների առջև ծառացած «սարսափն» աննախադեպ է վերջին տարիներին։
Ավելի քան երկու տասնյակ արևմտյան երկրներ վերջերս կոչ էին արել անհապաղ դադարեցնել պատերազմը՝ նշելով, որ Գազայում տառապանքները «հասել են նոր խորության»։
ՀԱՄԱՍ-ի կողմից վերահսկվող տարածքի Առողջապահության նախարարության տվյալներով՝ Գազայի հատվածում Իսրայելի ռազմական արշավի ընթացքում զոհվել է 59,106 պաղեստինցի, որոնց մեծ մասը քաղաքացիական անձինք են։ Երեքշաբթի Գազայի ամենամեծ հիվանդանոցի ղեկավարը հայտնել էր, որ վերջին երեք օրերի ընթացքում պաղեստինյան տարածքում թերսնման և սովի պատճառով մահացել է 21 երեխա։
Թարգմանությունը՝ Էմմա Չոբանյանի
