20.08.2026 | 23:01
«Նոան» նոր գլխավոր մարզիչ ունի
Թուրքիան ներկայացրել է իր առաջին գերձայնային Tayfun Block-4 հրթիռը
Քաղաքականություն
23.07.2025 | 15:45
Ստամբուլում IDEF 2025 միջազգային ցուցահանդեսում պաշտպանական հսկա Roketsan ընկերությունը ներկայացրել է իր առաջին գերձայնային հրթիռը՝ Tayfun Block-4-ը, հայտնում է Անադոլու գործակալությունը։
Tayfun Block-4 բալիստիկ հրթիռը Tayfun-ի՝ Թուրքիայի ազգային արտադրության ամենաերկար հեռահարության բալիստիկ հրթիռի գերձայնային տարբերակն է։
«Tayfun Block-4-ը հասնում է մեծ հեռահարության՝ սահմանելով ևս մեկ ռեկորդ թուրքական պաշտպանական արդյունաբերության համար: Ավելի քան 7 տոննա քաշով Tayfun-ի այս նոր տարբերակը՝ բազմաֆունկցիոնալ մարտագլխիկով, կկարողանա կիլոմետրերի հեռավորությունից ոչնչացնել բազմաթիվ ռազմավարական թիրախներ, ինչպիսիք են ՀՕՊ համակարգերը, հրամանատարական և վերահսկողական կենտրոնները, ռազմական անգարները և կարևորագույն ռազմական օբյեկտները»,- ասվում է Roketsan-ի հայտարարության մեջ:
300 Er արձակվող բալիստիկ հրթիռային համակարգը կարող է ինտեգրվել ռեակտիվ և զինված անօդաչու թռչող սարքերի հարթակներում՝ ավելի քան 500 կիլոմետր հեռահարությամբ, կախված արձակման բարձրությունից և արագությունից, այն կարող է արագորեն խոցել ռազմավարական թիրախներ։ Բացի այդ, Simsek-2 արբանյակային տիեզերական կրիչը կարող է 1500 կիլոգրամ (3307 ֆունտ) քաշով արբանյակներ տեղադրել արևային համաժամանակյա ուղեծրում՝ 700+ կիլոմետր բարձրության վրա։
Ընկերությունը հայտարարել է, որ արբանյակային կրիչի առաջին փորձարկումը ծրագրում է իրականացնել 2027 թվականին։
Հաղորդվում է, որ Ստամբուլում IDEF 2025 միջազգային պաշտպանական ցուցահանդեսին մասնակցում են 103 երկրների նախարարներ, շտաբների պետեր, հրամանատարներ և բարձրաստիճան ներկայացուցիչներ, իսկ 44 երկիր բացել է իր տաղավարը։ Միջոցառմանը մասնակցում են ավելի քան 900 տեղական և 400 օտարերկրյա պաշտպանական ընկերություններ։
Թարգմանությունը՝ Էմմա Չոբանյանի
