20.08.2026 | 23:01
«Նոան» նոր գլխավոր մարզիչ ունի
Թրամփը Բարաք Օբամային մեղադրել է պետական դավաճանության մեջ
Քաղաքականություն
23.07.2025 | 14:57
ԱՄՆ նախագահ Դոնալդ Թրամփը նախկին նախագահ Բարաք Օբամային մեղադրել է պետական դավաճանության և 2020 թվականի ընտրությունները կեղծելու մեջ։ Այս մասին Թրամփը հայտարարել է Սպիտակ տանը լրագրողների հետ զրույցում, փոխանցում է DW-ի ռուսական ծառայությունը։
«Դա դավաճանություն էր։ Նրանք փորձեցին գողանալ ընտրությունները, փորձեցին խճճել։ Նրանք արել են այնպիսի բաներ, որոնք ոչ ոք չէր կարող պատկերացնել, նույնիսկ այլ երկրներում»,- ասել է Թրամփը։
Բացի Օբամայից, որին նա անվանել է «խմբի ղեկավար», Թրամփը նաև այն ժամանակվա դեմոկրատ թեկնածու Հիլարի Քլինթոնին և իր նախորդ Ջո Բայդենին մեղադրել է 2020 թվականի ընտրությունները կեղծելու մեջ։
«Նրանց ամբողջ խումբը փորձել է կեղծել ընտրությունները, և նրանց բռնել են։ Նրանք իսկապես կեղծել են 2020 թվականի ընտրությունները»,- հայտարարել է Թրամփը։
ԱՄՆ նախագահն իր ելույթում հղում է արել Ազգային հետախուզության տնօրեն Թուլսի Գաբարդի կողմից անցյալ շաբաթ հրապարակված զեկույցին, որը եզրակացրել էր, որ Օբաման և նրա գլխավոր օգնականները «կեղծել և քաղաքականացրել են հետախուզական տվյալները», որոնք կապված են 2016 թվականի ընտրությունների վրա ազդելու՝ Ռուսաստանի ջանքերի հետ։ Նրա խոսքով՝ Օբաման և նրա վարչակազմը դեմոկրատների պարտությունից հետո դիտավորյալ կեղծել են ընտրական ենթակառուցվածքների վրա կիբերհարձակումների միջոցով Ռուսաստանի ազդեցության մասին համապատասխան զեկույցները։
«Այսպիսով, այս կեղծ հետախուզական տեղեկատվության ստեղծումը, որը պնդում է, որ Ռուսաստանն օգնել է Դոնալդ Թրամփին ընտրվել, հակասում էր ընտրություններին նախորդող ամիսներին արված բոլոր գնահատականներին, որոնք ասում էին ճիշտ հակառակը, որ Ռուսաստանը ո՛չ մտադրություն ուներ, ո՛չ էլ կարողություն՝ փորձել կոտրել ԱՄՆ նախագահական ընտրությունները»,- ասել է Գաբարդը։
Միևնույն ժամանակ, ինչպես նշում է CNN-ը, Գաբարդի զեկույցը չի հակասում նախորդ հետաքննություններին, որոնց համաձայն՝ Ռուսաստանը արշավ է իրականացրել Քլինթոնին վարկաբեկելու համար և փորձել է ազդել ընտրողների վրա, այդ թվում՝ կիբերհարձակումների միջոցով: Ոչ ոք չի պնդել, որ այդ հարձակումներն ուղղված են եղել հատուկ ընտրական ենթակառուցվածքների դեմ և դրանց նպատակը ձայներ գողանալն է եղել։
Գաբարդի կողմից հրապարակված էլեկտրոնային նամակների և ծառայողական գրառումների համաձայն՝ Օբամայի վարչակազմը եզրակացրել է, որ ռուս հաքերները, հավանաբար, չեն կարողանա կոտրել ընտրությունների ֆիզիկական ենթակառուցվածքը կամ աննկատ փոխել քվեարկության արդյունքը, սակայն նրանք կարող են ազդել ընտրողների կարծիքի վրա և խաթարել հանրային վստահությունը ընտրությունների նկատմամբ։
«Նախագահական իշխանության նկատմամբ հարգանքից ելնելով՝ մենք սովորաբար չենք պատասխանում Սպիտակ տնից եկող անընդհատ աբսուրդներին և ապատեղեկատվությանը։ Սակայն այս մեղադրանքներն այնքան վրդովեցուցիչ են, որ արժանի են պատասխանի։ Այս տարօրինակ մեղադրանքները ծիծաղելի են և ուշադրությունը շեղելու թույլ փորձ։ Անցյալ շաբաթ հրապարակված փաստաթուղթը չի հերքում լայնորեն ընդունված այն եզրակացությունը, որ Ռուսաստանը փորձել է ազդել 2016 թվականի նախագահական ընտրությունների վրա, բայց չի կարողացել հաջողությամբ մանիպուլյացիաներ կատարել քվեարկության ժամանակ։ Այդ եզրակացությունները վերահաստատվել են Սենատի երկկուսակցական հետախուզության հանձնաժողովի 2020 թվականի զեկույցում, որը գլխավորել է կոմիտեի այն ժամանակվա նախագահ Մարկո Ռուբիոն»,- հայտարարել է Բարաք Օբամայի մամուլի քարտուղար Պատրիկ Ռոդենբուշը։
Թարգմանությունը՝ Էմմա Չոբանյանի
