03.07.2026 | 01:00
ԱԱ-2026. Իսպանիան վստահ հաղթեց և 1/8 եզրափակիչում է. ՏԵՍԱՆՅՈՒԹ
90 տարեկանում կյանքից հեռացել է հայտնի լուսանկարիչ Արա Գյուլերը
18.10.2018 | 10:44
90 տարեկանում կյանքից հեռացել է հայտնի լուսանկարիչ Արա Գյուլերը 90 տարեկանում կյանքից հեռացել է աշխարհահռչակ հայ լուսանկարիչ Արա Գյուլերը: Նա մահացել է հոկտեմբերի 17-ին Ստամբուլում: Ermenihaber-ի փոխանցմամբ՝ լուսանկարչի ինքնազգացողությունը վատացել է, տեղափոխվել է Ստամբուլի Շիշլի թաղամասի «Florance Nightingale» հիվանդանոց: Բժիշկները 2 անգամ կարողացել են վերականգնել Գյուլերի սրտի աշխատանքը, սակայն չեն կարողացել փրկել կյանքը. նա մահացել է սրտի անբավարարությունից։ Արա Գյուլերին կոչում էին «Ստամբուլի աչք», «լավագույն ֆոտոպատմաբան»: «Դարի լավագույն լուսանկարիչ» կոչմանն արժանացած Գյուլերը լուսանկարել է բազմաթիվ աշխարհահռչակ դեմքերի, այդ թվում՝ Բերտրան Ռասելին, Ուինսթոն Չերչիլին, Մարկ Շագալին, Ալֆրեդ Հիչքոքին, Թենեսի Ուիլյամսին, Պաբլո Պիկասոյին, Սալվադոր Դալիին, Վիլյամ Սարոյանին, Սերգեյ Փարաջանովին և այլոց: Նրա աշխատանքները ներկայացված են աշխարհի մի շարք թանգարաններում, մասնավոր և ազգային հավաքածուներում: Վերջրերս Գյուլերի 90-ամյակի առիթով Ստամբուլում բացվել էր մեծանուն արվեստագետի թանգարանը: Լուսանկարչի անունով նաև Ստամբուլում փողոց կա: Արա Գյուլերը ծնվել է 1928 թ. օգոստոսի 16-ին Ստամբուլի Բեյողլու շրջանում: Իսկական անունն Արամ Գյուլերյան է: Դպրոցական տարիներից նա աշխատել է Թուրքիայի կինոստուդիաներում, զուգահեռ հաճախել թատերական դասընթացների: 1950 թվականից սկսել է աշխատել «Նոր Ստամբուլ» թերթում` զուգահեռ սովորելով Ստամբուլի համալսարանի տնտեսագիտական ֆակուլտետում: 1958թ. դարձել է ամերիկյան «Time Life», ֆրանսիական «Paris Match» և գերմանական «Der Stern» հանդեսների թղթակիցը: 1960-ականներից նրա լուսանկարները զարդարել են անվանի գրողների գրքեր, ցուցադրվել աշխարհի տարբեր երկրներում:
ermenihaber.am
