06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Երկիրը սկսել է ավելի արագ պտտվել․մինչև 2035թ-ը օրը կարող կրճատվել 1 վայրկյանով
22.07.2025 | 23:30
Երկիրը սկսել է ավելի արագ պտտվել իր առանցքի շուրջ, և մինչև 2035 թվականը հնարավոր է ստիպված լինենք օրվանից հանել մեկ ամբողջական վայրկյան, գրում է DW-ի ռուսական ծառայությունը։
Գիտնականները մտահոգված են․ մոլորակի պտույտի արագությունն աճում է․ հուլիսի 10-ը տարվա ամենակարճ օրն է դարձել՝ տևելով 1.36 միլիվայրկյանով պակաս ստանդարտ 24 ժամից (մեկ վայրկյանում կա 1000 միլիվայրկյան), գրում է CNN Science-ը՝ հղում անելով Երկրի պտույտի միջազգային ծառայությանը և ԱՄՆ ռազմածովային աստղադիտարանին։ Այս «պակասորդը» առօրյա կյանքում մարդիկ չեն զգա, բայց կարող է բացասաբար ազդել համակարգիչների, արբանյակների, նավիգացիոն համակարգերի և հեռահաղորդակցության աշխատանքի վրա։ 1955 թվականից ի վեր ճշգրիտ ժամանակը չափելու համար օգտագործվում են հատուկ ատոմային ժամացույցներ։
Հետաքրքիր է, որ մոլորակը նախկինում ավելի դանդաղ էր պտտվում, ուստի 1972 թվականից ի վեր գիտնականները 27 անգամ ավելացրել են 1 վայրկյան համակարգված համընդհանուր ժամանակին (UTC)։
Սակայն ժամանակի ընթացքում մոլորակը սկսել է ավելի արագ պտտվել, և 2016 թվականից ի վեր ոչ մի վայրկյան չի ավելացվել։ Եվ հիմա գիտնականները չեն բացառում, որ կարող է անհրաժեշտություն առաջանալ 1 վայրկյան պակասեցնել օրվա տևողությունից։ Մասնագետները զգուշացնում են, որ ամբողջ աշխարհում էլեկտրատեխնիկական սարքավորումների և համակարգիչների համար սա կարող է դառնալ «2000 խնդրի» նման մի բան, երբ բոլորը վախենում էին, որ համակարգիչները չեն կարողանա հաղթահարել տարեթվի՝ «99»-ից մինչև «00» «զրոյացումը»։
Ուշագրավ է, որ գլոբալ տաքացումը, որն, ընդհանուր առմամբ, բացասական ազդեցություն ունի մոլորակի վրա, հակազդում է Երկրի պտույտի արագացմանը. եթե սառույցների արագացված հալոցքը տեղի չունենար, հնարավոր է, 24 ժամից 1 վայրկյան հանելու անհրաժեշտություն առաջանար հենց հիմա։
Թարգմանությունը՝ Էմմա Չոբանյանի
